ఆగస్టు 27న వినాయక చవితి (Ganesh Chaturthi) పండుగ సందర్భంగా దేశమంతా గణేష్ ఉత్సవాలకు సిద్ధమవుతోంది. ముఖ్యంగా తెలుగు రాష్ట్రాల్లో, ముంబైలో గణేష్ ఉత్సవాలు అంబరాన్ని అంటుతాయి. ఈ ఉత్సవాలకు హైలైట్గా నిలిచే హైదరాబాద్లోని ఖైరతాబాద్ మహా గణపతి (khairatabad ganesh 2025) విగ్రహం సిద్ధమైంది. ఈ ఏడాది 69 అడుగుల ఎత్తులో శ్రీ విశ్వ శాంతి మహాశక్తి గణపతిగా వినాయకుడు భక్తులకు దర్శనం ఇవ్వనున్నాడు. విగ్రహ నిర్మాణంలో చివరి దశ అయిన కన్ను దిద్దడం పూర్తయింది. ఈ పనిని శిల్పి రాజేందర్ పూర్తి చేశారు. ఈ విగ్రహం 3 తలలతో, 8 చేతులతో, నిలబడి ఉన్న భంగిమలో ఉంటుంది. కుడివైపు చేతుల్లో ఆయుధం, సుదర్శన చక్రం, అభయహస్తం, రుద్రాక్షమాల ఉంటాయి. విగ్రహానికి ఇరువైపులా శ్రీ జగన్నాథ స్వామి, శ్రీ లక్ష్మీ సమేత హయగ్రీవ స్వామి వారు, మరియు లలిత త్రిపుర సుందరి, శ్రీ గజ్జలమ్మ దేవి విగ్రహాలు కూడా ఉంటాయి.
భక్తులకు ట్రాఫిక్ ఆంక్షలు
వినాయక చవితి సందర్భంగా ఖైరతాబాద్ మహా గణపతి(khairatabad ganesh 2025)ని దర్శించుకోవడానికి తెలుగు రాష్ట్రాల నుంచే కాకుండా దేశం నలుమూలల నుంచి వేలాది మంది భక్తులు వస్తారు. దీనిని దృష్టిలో ఉంచుకుని పోలీసులు ట్రాఫిక్ ఆంక్షలు విధించారు. ఈ ఆంక్షల ప్రకారం, ఖైరతాబాద్ నుంచి మింట్ కాంపౌండ్ వైపు వచ్చే వాహనాలను సంత్ నిరంకారి జంక్షన్ వైపు మళ్లిస్తారు. ఓల్డ్ సైఫాబాద్ పోలీస్ స్టేషన్ నుంచి రాజ్ దూత్ వైపు వచ్చే వాహనాలను ఇక్బాల్ మినార్ వైపు మళ్లిస్తారు. అలాగే, ఇక్బాల్ మినార్ నుంచి ఐ మ్యాక్స్ వైపు వెళ్లే వాహనాలను సెక్రటేరియట్ మీదుగా తెలుగుతల్లి జంక్షన్ వైపు మళ్లించారు. నెక్లెస్ రోడ్ రోటరీ నుంచి మింట్ కాంపౌండ్ వైపు వచ్చే వాహనాలు ఖైరతాబాద్ ఫ్లైఓవర్ మీదుగా వెళ్ళవలసి ఉంటుంది.
గణేష్ నవరాత్రులు
ఖైరతాబాద్ గణేష్ ఉత్సవాలు 11 రోజులపాటు ఘనంగా జరుగుతాయి. ఇక్కడ జరిగే గణేష్ నవరాత్రులు ఒక పెద్ద పండుగ వాతావరణాన్ని తలపిస్తాయి. భక్తులు భారీ సంఖ్యలో తరలివచ్చి పూజలు, మొక్కులు చెల్లిస్తారు. ఈ ఉత్సవాలు హైదరాబాద్ నగరానికి ఒక ప్రత్యేకమైన గుర్తింపును తెచ్చాయి. ఈ ఏడాది మహా గణపతి విగ్రహం “శ్రీ విశ్వ శాంతి మహాశక్తి గణపతి” పేరుతో దర్శనం ఇవ్వనుండటంతో, భక్తుల సందర్శన మరింత ఎక్కువ ఉంటుందని నిర్వాహకులు అంచనా వేస్తున్నారు. ఈ నవరాత్రులు రాష్ట్ర సంస్కృతి, సంప్రదాయాలకు అద్దం పడతాయి.