అమెరికా అధ్యక్షుడు డొనాల్డ్ ట్రంప్ తాజాగా విధించిన H1B వీసా ( H-1B Visa) నిబంధనలపై భారత్ తొలిసారిగా అధికారికంగా స్పందించింది. విదేశాంగ శాఖ అధికార ప్రతినిధి రణ్ ధీర్ జైస్వాల్ ప్రకటనలో, ఈ నిబంధనల ప్రభావం కేవలం భారతీయులపైనే కాకుండా ఇరుదేశాల్లోని అనేక సంస్థలపై పడుతుందని తెలిపారు. ప్రత్యేకంగా ఐటీ రంగం, టెక్నాలజీ ఆధారిత పరిశ్రమలు, కన్సల్టెన్సీ సంస్థలు వంటి విభాగాలు ఈ మార్పుల వలన ప్రతికూల పరిస్థితులను ఎదుర్కోవాల్సి వస్తుందని ఆయన స్పష్టం చేశారు.
జైస్వాల్ వ్యాఖ్యల ప్రకారం.. H1B వీసా నిబంధనల కారణంగా ఎన్నో కుటుంబాలు ఇబ్బందుల్లో పడే అవకాశం ఉందని భారత్ ఆందోళన వ్యక్తం చేసింది. అమెరికాలో ఉద్యోగాలు చేసుకుంటున్న భారతీయుల పెద్ద శాతం H1B వీసాలపై ఆధారపడి జీవనోపాధి కొనసాగిస్తున్న విషయం తెలిసిందే. వీసా పరిమితులు లేదా కఠినతర నిబంధనలు ప్రవేశపెట్టడం వల్ల వారు ఎదుర్కొనే సమస్యలు కేవలం వ్యక్తిగత స్థాయిలోనే కాకుండా, కుటుంబ స్థాయిలోనూ తీవ్ర ప్రభావాన్ని చూపుతాయని జైస్వాల్ అభిప్రాయపడ్డారు.
అదేవిధంగా అమెరికా ప్రభుత్వానికి (US Govt) భారత్ నమ్మకం వ్యక్తం చేస్తోంది. ఈ నిబంధనల వల్ల తలెత్తే సమస్యలను అమెరికా సర్కారు గుర్తించి, పరిష్కార మార్గాలను కనుగొంటుందని జైస్వాల్ ఆశాభావం వ్యక్తం చేశారు. ఇరుదేశాల మధ్య ఆర్థిక సంబంధాలు, వ్యాపార భాగస్వామ్యాలు దెబ్బతినకుండా చూసుకోవడం రెండు దేశాలకీ సమానంగా అవసరమని ఆయన స్పష్టం చేశారు. భారత్-అమెరికా సంబంధాలు పరస్పర ప్రయోజనాలపై ఆధారపడి ఉన్నందున, H1B వీసా అంశంలో సౌకర్యవంతమైన విధానం పాటించాలని భారత్ సూచించింది.
