అమెరికా అధ్యక్షుడు డొనాల్డ్ ట్రంప్ (Donald Trump ) తాజా ప్రకటనలో భారత్, చైనా, పాకిస్తాన్ సహా 23 దేశాలను డ్రగ్స్ ఉత్పత్తి కేంద్రాలుగా పేర్కొన్నారు. ఈ దేశాలు నిషేధిత మాదకద్రవ్యాలు (Drugs), వాటి తయారీకి అవసరమైన రసాయనాలను ఉత్పత్తి చేసి రవాణా చేస్తున్నాయని ఆరోపించారు. అమెరికా ప్రజల ఆరోగ్య భద్రతకు, ముఖ్యంగా యువత భవిష్యత్తుకు ఇది తీవ్రమైన ముప్పుగా మారిందని ట్రంప్ స్పష్టం చేశారు. ఈ వివరాలను ఆయన US కాంగ్రెస్కు సమర్పించిన “ప్రెసిడెన్షియల్ డిటర్మినేషన్” నివేదికలో ప్రస్తావించారు.
ట్రంప్ పేర్కొన్న దేశాల జాబితాలో భారత్, చైనా, పాక్తో పాటు అఫ్గాన్, మెక్సికో, హైతీ, కొలంబియా, పెరూ, పనామా, బొలీవియా, బర్మా వంటి దేశాలు ఉన్నాయి. ఈ దేశాల్లో డ్రగ్ మాఫియాలు బలంగా విస్తరించుకుని, అంతర్జాతీయ స్థాయిలో మాదకద్రవ్యాల స్మగ్లింగ్కి పాల్పడుతున్నాయని నివేదికలో పేర్కొనబడింది. ముఖ్యంగా హెరాయిన్, కోకైన్, మెతాంఫెటమైన్ వంటి ప్రాణాంతక డ్రగ్స్ సరఫరాలో ఈ దేశాల కీలక పాత్ర ఉందని ఆరోపించారు. రసాయన పదార్థాల ఉత్పత్తి, వాటి అక్రమ రవాణా కూడా అమెరికాకు పెద్ద సవాలుగా మారిందని నివేదికలో స్పష్టం చేశారు.
ఈ ఆరోపణలతో సంబంధిత దేశాలు అంతర్జాతీయ వేదికలపై వివరణ ఇవ్వవలసి వస్తుందని విశ్లేషకులు అంటున్నారు. అమెరికా గతంలో కూడా డ్రగ్ ఉత్పత్తి, స్మగ్లింగ్పై కఠిన వైఖరిని అవలంబించింది. ఇప్పుడు ట్రంప్ చేసిన ఈ ప్రకటనతో సంబంధిత దేశాలపై ఒత్తిడి మరింత పెరిగే అవకాశం ఉంది. డ్రగ్స్ సమస్య కేవలం అమెరికాకు మాత్రమే కాకుండా ప్రపంచవ్యాప్తంగా సామాజిక, ఆర్థిక, ఆరోగ్య సమస్యలకు దారితీస్తోందని నిపుణులు హెచ్చరిస్తున్నారు. ఈ క్రమంలో అంతర్జాతీయ సహకారం తప్పనిసరిగా కావాలని విశ్లేషకులు సూచిస్తున్నారు.