తుఫాన్ ‘మొంథా’ ప్రభావం ఇంకా పూర్తిగా తగ్గకపోవడంతో తెలంగాణ రాష్ట్రంలో ఇవాళ కూడా వర్షాలు కురిసే అవకాశం ఉందని భారత వాతావరణశాఖ (IMD) వెల్లడించింది. ముఖ్యంగా ఉత్తర తెలంగాణ జిల్లాలు ఆదిలాబాద్, ములుగు, మంచిర్యాల, భూపాలపల్లి, ఆసిఫాబాద్లలో భారీ వర్షాలు కురిసే అవకాశం ఉందని హెచ్చరికలు జారీ చేసింది. ఈ జిల్లాల్లో ఇప్పటికే నిన్నటి నుంచి మోస్తరు నుండి భారీ వర్షాలు కురుస్తుండటంతో పలు తక్కువ స్థాయి ప్రాంతాల్లో నీరు నిలిచిపోయింది. కొన్ని చోట్ల చెట్లు కూలిపోవడం, రహదారులు దెబ్బతినడం, విద్యుత్ సరఫరా అంతరాయం వంటి సమస్యలు ఎదురవుతున్నాయి. స్థానిక ప్రజలు అప్రమత్తంగా ఉండాలని, అవసరం లేనప్పుడు బయటకు వెళ్లవద్దని అధికారులు సూచించారు.
Breaking News – Rain Effect : ఈరోజు కూడా తెలంగాణ లో పలు జిల్లా స్కూళ్లకు సెలవు
ఇక హైదరాబాద్ సహా దక్షిణ, మధ్య తెలంగాణ జిల్లాల్లో మోస్తరు వర్షాలు పడే అవకాశం ఉందని వాతావరణశాఖ అంచనా వేసింది. గాలుల దిశ మార్పు కారణంగా వాతావరణం తేమగా మారి, సాయంత్రం తర్వాత పిడుగులు, గాలులతో కూడిన వర్షాలు పడవచ్చని తెలిపింది. రాష్ట్రంలో కొన్ని ప్రాంతాల్లో విద్యుత్ పరికరాలు దెబ్బతినే ప్రమాదం ఉన్నందున ప్రజలు జాగ్రత్తలు తీసుకోవాలని సూచించారు. వ్యవసాయరంగంలో ఈ వర్షాలు కొంత మేలు చేస్తాయనే అంచనా ఉన్నప్పటికీ, ఇప్పటికే పంటలు నీటమునిగిన ప్రాంతాల్లో రైతులు ఆందోళన చెందుతున్నారు.
అటు పొరుగు రాష్ట్రం ఆంధ్రప్రదేశ్లో మాత్రం వర్షాలు తగ్గుముఖం పట్టాయి. మొంథా తుఫాన్ ప్రభావం అక్కడ తగ్గడంతో ఈరోజు శ్రీకాకుళం, విజయనగరం, మన్యం, అల్లూరి సీతారామరాజు, విశాఖపట్నం, చిత్తూరు, తిరుపతి జిల్లాల్లో తేలికపాటి వానలు పడవచ్చని IMD తెలిపింది. మిగతా జిల్లాల్లో వాతావరణం ప్రధానంగా మేఘావృతంగా ఉండి, రాత్రి వేళల్లో కొంతమేర చల్లదనం కనిపించే అవకాశం ఉందని వెల్లడించింది. సముద్రం ఇంకా అలజడి స్థితిలో ఉండటంతో మత్స్యకారులు మరో రెండు రోజులు సముద్ర యాత్రలు చేయొద్దని సూచనలు జారీ చేసింది. మొత్తానికి మొంథా తుఫాన్ దూరమవుతున్నా, దాని అవశేష ప్రభావం తెలంగాణపై కొనసాగుతూనే ఉందని వాతావరణ నిపుణులు చెబుతున్నారు.
Read hindi news: https://hindi.vaartha.com
Epaper : https://epaper.vaartha.com/