కంచ గచ్చిబౌలి భూముల వివాదం పై దేశవ్యాప్తంగా దృష్టి కేంద్రీకరించిన నేపథ్యంలో, ఈ రోజు సుప్రీం కోర్టులో ఈ కేసుపై కీలక విచారణ జరగనుంది. ఇప్పటికే ఈ అంశం సామాజిక, రాజకీయ వర్గాల్లో పెద్ద ఎత్తున చర్చనీయాంశంగా మారింది. భూములను చదును చేసే పనులు ప్రారంభించడంతో, సుప్రీం కోర్టు సుమోటోగా ఈ కేసును స్వీకరించి తాత్కాలికంగా అన్ని పనులపై స్టే ఆదేశాలు జారీ చేసిన సంగతి తెలిసిందే.
20 ఏళ్లుగా వివాదంలో భూములు
ఈ కేసులో అత్యున్నత న్యాయస్థానం ఆదేశాల మేరకు తెలంగాణ రాష్ట్ర ప్రభుత్వ ప్రధాన కార్యదర్శి (CS) శాంతికుమారి అఫిడవిట్ దాఖలు చేశారు. అందులో, కంచ గచ్చిబౌలి భూములు ప్రభుత్వానికి చెందినవే అని స్పష్టంగా పేర్కొన్నారు. గత 20 ఏళ్లుగా ఈ భూములు న్యాయపరమైన వివాదాల్లో ఉండటంతో ఆ స్థలంలో చెట్లు పెరిగాయని కూడా అఫిడవిట్లో వివరించారు. భూములపై ఉన్న వివాదాల కారణంగా ఈ ప్రాంత అభివృద్ధి నిలిచిపోయిందని పేర్కొన్నారు.
సుప్రీం కోర్టులో జరిగే విచారణపై ఆసక్తి
ఇక నేడు సుప్రీం కోర్టులో జరిగే విచారణను అన్ని వర్గాలు ఆసక్తిగా ఎదురు చూస్తున్నాయి. ఈ కేసు తీర్పు రాష్ట్ర భూ నిర్వహణ విధానాలపై ప్రభావం చూపే అవకాశముంది. ఇదే సమయంలో ఈ భూములపై హక్కులను నిరూపించుకునే ప్రయత్నాలు చేస్తున్నారు. చివరకు న్యాయస్థానం తీర్పుతో ఈ వివాదానికి ముగింపు పడుతుందా? లేక మరింత రాజకీయ, న్యాయ ప్రక్రియలద్వారా దీర్ఘకాలంగా కొనసాగుతుందా అన్నది చూడాల్సిందే.