ఐబొమ్మ రవి కేసు ఇప్పుడు కేవలం పైరసీ లేదా కాపీరైట్ ఉల్లంఘనలకే పరిమితం కాకుండా, భారీ ఆర్థిక నేరంగా రూపాంతరం చెందింది. తాజాగా ఈ కేసులో ఎన్ఫోర్స్మెంట్ డైరెక్టరేట్ (ED) జోక్యం చేసుకోవడంతో రవి చుట్టూ ఉచ్చు మరింత బిగుసుకుంది. పోలీసులు సమర్పించిన రిమాండ్ రిపోర్టులో వెల్లడైన భారీ ఆర్థిక లావాదేవీల ఆధారంగా, మనీలాండరింగ్ జరిగినట్లు ఈడీ అధికారులు బలంగా అనుమానిస్తున్నారు. ఈ క్రమంలోనే కేసు పూర్తి వివరాలను, ఎఫ్ఐఆర్ (FIR) కాపీలను మరియు ఇప్పటివరకు సేకరించిన ఆధారాలను తమకు అందించాలని కోరుతూ ఈడీ అధికారులు హైదరాబాద్ నగర పోలీస్ కమిషనర్కు లేఖ రాశారు. పైరసీ ద్వారా సంపాదించిన అక్రమ సొమ్మును రవి వేర్వేరు మార్గాల్లో మళ్లించినట్లు తేలితే, పీఎంఎల్ఏ (PMLA) చట్టం కింద ఆస్తుల జప్తు చేసే అవకాశం కూడా ఉంది.
Telugu News: Bangladesh: తిరుగులేని నాయకురాలు షేక్ హసీనా.. అయినా ఉరిశిక్ష
పోలీసుల దర్యాప్తులో రవి ఆర్థిక మూలాలకు సంబంధించి విస్తుపోయే నిజాలు వెలుగులోకి వచ్చాయి. సాధారణ బ్యాంకింగ్ వ్యవస్థ ద్వారా కాకుండా, నిఘా సంస్థల కళ్లుగప్పేందుకు రవి క్రిప్టో కరెన్సీ మార్గాన్ని ఎంచుకున్నట్లు రిమాండ్ రిపోర్టు స్పష్టం చేస్తోంది. విదేశీ క్రిప్టో వాలెట్ల నుండి రవి వ్యక్తిగత ఖాతాలకు పెద్ద మొత్తంలో నిధులు బదిలీ అయినట్లు పోలీసులు గుర్తించారు. ప్రధానంగా ఐబొమ్మ సైట్లో కనిపించే బెట్టింగ్ యాప్ల ప్రకటనల ద్వారానే ఈ ఆదాయం సమకూరినట్లు తెలుస్తోంది. ఐబొమ్మ సైట్కు వచ్చే కోట్లాది మంది వీక్షకులను ఈ బెట్టింగ్ సైట్ల వైపు మళ్లించడం ద్వారా, సదరు బెట్టింగ్ కంపెనీల నుండి క్రిప్టో రూపంలో రవికి కమీషన్లు ముట్టినట్లు అధికారులు అనుమానిస్తున్నారు. ఇది అంతర్జాతీయ హవాలా రాకెట్తో సంబంధాలు కలిగి ఉండే అవకాశాలను కూడా లేవనెత్తుతోంది.
అత్యంత సాంకేతిక పరిజ్ఞానంతో, ఆచూకీ దొరక్కుండా సర్వర్లను మారుస్తూ వచ్చిన రవిని పట్టుకోవడంలో ‘ట్రాఫిక్ డొమైన్లు’ కీలక పాత్ర పోషించాయి. ఐబొమ్మ ప్రధాన వెబ్సైట్కు మరియు బెట్టింగ్ సైట్లకు మధ్య వినియోగదారులు వెళ్లేందుకు రవి రెండు ప్రత్యేకమైన ట్రాఫిక్ డొమైన్లను సృష్టించాడు. వీటిలో ఒక డొమైన్ను అమెరికాలో రిజిస్టర్ చేయించగా, మరొక దానిని హైదరాబాద్లోని అమీర్పేట్ కేంద్రంగా రిజిస్టర్ చేయించాడు. విదేశీ సర్వర్ల వెనుక దాక్కున్నప్పటికీ, అమీర్పేట్లో రిజిస్టర్ అయిన ఈ ఒక్క డొమైన్ ఐపీ అడ్రస్, రిజిస్ట్రేషన్ వివరాల ఆధారంగా పోలీసులు తీగ లాగడంతో రవి డొంక కదిలింది. ఈ సాంకేతిక పొరపాటే రవిని పోలీసులకు చిక్కేలా చేసిందని దర్యాప్తు అధికారులు వెల్లడించారు.
Read hindi news: https://hindi.vaartha.com
Epaper : https://epaper.vaartha.com/