శామీర్పేటలో దేవుడి (God) పేరు చెప్పి అమాయకులను మోసం చేస్తూ డబ్బులు వసూలు చేస్తున్న నలుగురు సభ్యుల ముఠాను పోలీసులు అదుపులోకి తీసుకున్నారు. నాగరాజు, శ్రీనాథ్, లక్ష్మణ్, రాజు అనే నిందితులు ఈ మోసపూరిత కార్యకలాపాల్లో పాల్గొన్నట్లు విచారణలో తేలింది. సీఐ శ్రీనాథ్ వివరాల ప్రకారం, ఈ నిందితులు శివసాయి నారాయణ అనే వ్యక్తి ఇంటికి వెళ్లి మొదట ఆయన చేతికి “దేవుని దారం” కట్టి నమ్మకం కలిగించారు. ఆ తర్వాత పేరు అడిగి రాసుకుని, తూంకుంట వద్ద దుర్గామాత విగ్రహం ఏర్పాటు చేస్తున్నామంటూ రూ.20 వేలు చందా పేరుతో బలవంతంగా డబ్బు ఇవ్వాలని ఒత్తిడి చేశారు. బాధితుడు నిరాకరించగా, దారం కట్టినందున తప్పకుండా డబ్బు ఇవ్వాల్సిందే అని బెదిరించారు.
చందా పేరుతో రూ.2 వేలు డిమాండ్
ఈ ముఠా శివసాయి నారాయణకే కాకుండా అదే కాలనీలో మరో వ్యక్తిని కూడా ఇలాగే డబ్బు కోసం బెదిరించినట్లు పోలీసులు గుర్తించారు. చందా పేరుతో రూ.2 వేలు డిమాండ్ చేసినా, చివరకు రూ.500 ఫోన్పే ద్వారా వసూలు (Frauds ) చేశారు. అసలు వారు చెప్పినట్టుగా ఎలాంటి విగ్రహ ప్రతిష్ట చేయడం లేదని తెలిసిన శివసాయి నారాయణ వెంటనే పోలీసులకు ఫిర్యాదు చేశారు. కేసు నమోదు చేసిన పోలీసులు, నిందితులు వసూళ్లకు ఉపయోగించిన పద్ధతి, వారి ఫోన్ ట్రాకింగ్ ఆధారంగా వారిని గుర్తించి అరెస్ట్ చేశారు. నిందితుల వద్ద నుంచి నాలుగు మొబైల్ ఫోన్లు, రెండు బైకులు స్వాధీనం చేసుకున్నారు. ఇది వీరంతా ఎలాంటి ఈజీ మనీకి అలవాటు పడి ప్రజలను దోచుకోవడంలో నిమగ్నమయ్యారని స్పష్టమవుతోంది.
డబ్బులు వసూలు చేయడం చట్టవిరుద్ధం
దేవుడి పేరుతో కానీ, మరే ఇతర రూపంలో కానీ డబ్బులు వసూలు చేయడం చట్టవిరుద్ధమని పోలీసులు స్పష్టం చేశారు. ఇలాంటి మోసపూరిత ఘటనలు ఎదురైతే వెంటనే పోలీసులకు సమాచారం అందించాలని ప్రజలకు సూచించారు. అమాయకుల విశ్వాసాన్ని దుర్వినియోగం చేస్తూ, తప్పుడు హేతువులపై డబ్బులు వసూలు చేసే వారి పట్ల కఠిన చర్యలు తీసుకుంటామని హెచ్చరించారు. ఈ సంఘటన సమాజంలో పెరుగుతున్న “ఈజీ మనీ మోసాల”ను బయటపెట్టడమే కాకుండా, ప్రజలు మరింత అప్రమత్తంగా ఉండాల్సిన అవసరాన్ని కూడా తెలియజేస్తోంది. ఇలాంటి ఘటనలు పునరావృతం కాకుండా సమాజం సజాగ్రత్తగా స్పందించడం ఎంతో ముఖ్యం.