ఆంధ్రప్రదేశ్కు తిరిగి గర్వకారణంగా నిలవబోయే రాజధాని అమరావతి ఇప్పుడు మరోసారి చైతన్యాన్ని పొందుతోంది. 2019 ఎన్నికల తరువాత ఆగిపోయిన అమరావతి అభివృద్ధి పనులకు 2025లో కూటమి ప్రభుత్వం అధికారంలోకి వచ్చి శుభారంభం చేసింది. రెండు రోజుల క్రితం జరిగిన ఘనమైన కార్యక్రమంలో, ప్రధాని నరేంద్ర మోదీ అమరావతిలోని పలు అభివృద్ధి పనులకు శంకుస్థాపన చేయడం, కొన్ని ప్రాజెక్టులకు ప్రారంభోత్సవం చేయడం ద్వారా ఈ పునఃప్రారంభానికి కొత్త ఊపును తీసుకువచ్చారు.
ప్రధాని మోదీ హామీతో ఊపందుకున్న అభివృద్ధి
ఈ కార్యక్రమంలో ప్రధాని మోదీ స్పష్టంగా పేర్కొన్నట్లు, అమరావతి నిర్మాణానికి కేంద్ర ప్రభుత్వం సంపూర్ణ మద్దతు ఇస్తుందని హామీ ఇచ్చారు. ఆయన చేతుల మీదుగా జరిగిన ప్రారంభోత్సవాల నేపథ్యంలో, రాష్ట్ర ప్రభుత్వం నిర్మాణ పనులను మరింత వేగవంతం చేయడానికి చర్యలు ప్రారంభించింది. రాజధాని పనులు తక్షణమే ప్రారంభించేందుకు ముఖ్యమంత్రి చంద్రబాబు, మంత్రులు, అధికార యంత్రాంగం పూర్తిస్థాయిలో కృషి చేస్తున్నారు.
ఐకానిక్ భవనాల డిజైన్ ఖరారు దశలో
ఈ క్రమంలోనే, అమరావతిలో అత్యంత ప్రతిష్టాత్మకంగా అభివృద్ధి చేయాలనుకున్న ఐదు ఐకానిక్ టవర్లు, అసెంబ్లీ భవనం, హైకోర్టు భవనాల నిర్మాణానికి సంబంధించి తుది డిజైన్లను ఖరారు చేయడంలో ప్రభుత్వం నిమగ్నమై ఉంది. సీఆర్డీఏ కార్యాలయంలో నార్మన్ ఫోస్టర్, హఫీజ్ కాంట్రాక్టర్స్, ఎల్ అండ్ టీ వంటి అంతర్జాతీయ స్థాయి ఆర్కిటెక్చర్, ఇంజనీరింగ్ సంస్థలతో మంత్రి నారాయణ సమీక్ష సమావేశాలు నిర్వహించారు. భవిష్యత్తులో అమరావతికి గుర్తుగా నిలిచే ఈ భవనాల నిర్మాణానికి ఆధునిక డిజైన్లు, భద్రతా ప్రమాణాలు, మరియు ఆధారిత మౌలిక సదుపాయాలపై దృష్టి పెట్టనున్నారు.
ముందుగా 2014లో టీడీపీ ప్రభుత్వం అమరావతిని రాజధానిగా ప్రకటించగా, అప్పట్లో ర్యాప్ట్ ఫౌండేషన్లతో నిర్మాణ పనులకు పునాదులు వేసినట్లు గుర్తించాలి. అయితే 2019 ఎన్నికల తర్వాత అధికారంలోకి వచ్చిన వైఎస్ జగన్ మోహన్ రెడ్డి ప్రభుత్వం మూడు రాజధానుల తెరపైకి తీసుకురావడంతో అమరావతి నిర్మాణ పనులకు బ్రేకులు పడ్డాయి. ఆతర్వాత ఐదేళ్ల పాటు పనులు నిలిచిపోయాయి. ఇప్పుడు తిరిగి కూటమి అధికారంలోకి రావడంతో అమరావతికి జీవం పునరుద్దరమవుతోంది.
సీఎం చంద్రబాబు స్పందన
పునఃప్రారంభ కార్యక్రమం విజయవంతంగా జరిగిందని తెలియజేస్తూ, ముఖ్యమంత్రి చంద్రబాబు నాయుడు స్పందిస్తూ, ఈ కార్యక్రమానికి ప్రజల సహకారం, ప్రభుత్వ యంత్రాంగం సమర్థవంతమైన నిర్వహణ కారణమని ప్రశంసించారు. ప్రధానమంత్రి మోదీ అమరావతిని “ఒక నగరం కాదు – ఒక శక్తి”గా అభివర్ణించిన మాటలు అందరికీ ప్రేరణనిచ్చాయని ఆయన అన్నారు. మోదీ ప్రసంగం రాష్ట్రాభివృద్ధిపై ఆయనకు ఉన్న చిత్తశుద్ధికి నిదర్శనమని పేర్కొన్నారు. టెలీకాన్ఫరెన్స్ ద్వారా కూటమి ఎంపీలు, ఎమ్మెల్యేలు, మంత్రులతో మాట్లాడిన సీఎం చంద్రబాబు – ఇది రాజధాని మాత్రమే కాదు, భవిష్యత్ తరాల భద్రతకు, అభివృద్ధికి, ఐక్యతకు చిహ్నం అని పేర్కొన్నారు. ప్రజల భాగస్వామ్యం, కేంద్ర మద్దతు, సాంకేతిక పరిజ్ఞానం మిళితమైతే అమరావతి ఒక గ్లోబల్ సిటీగా ఎదుగుతుందన్న విశ్వాసాన్ని వ్యక్తం చేశారు. ఈ క్రమంలో రాజధానిని రెండు నుంచి మూడు సంవత్సరాల్లో పూర్తిగా అభివృద్ధి చేయడానికి సీఆర్డీఏ కార్యాచరణ ప్రణాళిక రూపొందిస్తోంది. ఇందులో ప్రభుత్వ కార్యాలయాలు, విద్యా, ఆరోగ్య, సాంకేతిక హబ్లు, గ్రిన్స్పేస్లు, రవాణా మౌలిక వసతులు మొదలైనవి ప్రాధాన్యత పొందనున్నాయి.
Read also: Accident : ఒంగోలు సమీపంలో రోడ్డు ప్రమాదం..ఐదుగురు మృతి