ఆంధ్రప్రదేశ్ రాష్ట్రంలో గత వైసీపీ ప్రభుత్వ హయాంలో ప్రారంభమైన ఇంటింటికీ రేషన్ పంపిణీ పథకం కీలక పరిణామాన్ని ఎదుర్కొంది. ప్రజల చెంతకు నేరుగా రేషన్ సరుకులు చేర్చే ఈ పథకం కింద సుమారు 9600 వాహనాలు కొనుగోలు చేసి, ఆయా ప్రాంతాల్లో నియమించిన ఆపరేటర్ల ద్వారా సరఫరా చేయబడుతూ వచ్చాయి. అయితే ప్రస్తుత ఎన్డీఏ కూటమి ప్రభుత్వం ఈ వ్యవస్థను పూర్తిగా సమీక్షించి, ఈ ఇంటింటికీ రేషన్ పంపిణీ విధానాన్ని రద్దు చేస్తూ నిర్ణయం తీసుకుంది.
ప్రభుత్వం తీసుకున్న నిర్ణయం – ఏమిటి? ఎందుకు?
ప్రస్తుతం అధికారంలో ఉన్న కూటమి ప్రభుత్వం తమ ప్రభుత్వం ఆర్థిక భారం తగ్గించడానికి, మరియు రేషన్ పంపిణీ వ్యవస్థలో పారదర్శకతను పెంచేందుకు ఈ నిర్ణయం తీసుకున్నట్లు స్పష్టం చేసింది. ఇంటింటికి రేషన్ పంపిణీ విధానం వల్ల వ్యయ భారం అధికమైందని వాహనాల నిర్వహణ, డ్రైవర్ల జీతాలు, ఇంధన ఖర్చులు ప్రభుత్వం భరించలేని స్థాయిలో ఉన్నాయని పాత విధానం కంటే రేషన్ దుకాణాల ద్వారా సరఫరా చేయడం ప్రభావవంతంగా ఉంటుందని ఈ క్రమంలో ఇంటింటికీ పంపిణీ విధానాన్ని నిలిపివేసి, ప్రజలు తమకు కేటాయించిన రేషన్ షాపుల వద్దే సరుకులు తీసుకునే విధంగా మార్పులు చేశారు.
వాహనాల రద్దుతో ప్రభావితమైన కుటుంబాలు
రేషన్ వాహనాలు రద్దు చేస్తూ ప్రభుత్వం తీసుకున్న నిర్ణయంపై అమలాపురంలో ఆపరేటర్లు చేపట్టిన ఆందోళనకు విపక్ష వైసీపీ నేతలు మద్దతు తెలిపారు. ఎండీయూ వాహనాల ఆపరేటర్ల నిరసనకు సంఘీభావం తెలిపారు. జగన్ సర్కార్ హయాంలో ప్రవేశపెట్టిన రేషన్ వాహనాల్ని కూటమి ప్రభుత్వం కక్షపూరితంగా రద్దు చేసిందని వైసీపీ మాజీ ఎమ్మెల్యే చిర్ల జగ్గిరెడ్డి ఆరోపించారు. ఇంటింటికి రేషన్ పథకం నిర్వీర్యం వల్ల ఆంధ్రప్రదేశ్ రాష్ట్రంలో సుమారు 9600 కుటుంబాలు రోడ్డున పడ్డాయని ఆయన విమర్శించారు.వైసీపీ ప్రజాప్రతినిధులతో కలిసి ఆయన రేషన్ వాహన ఆపరేటర్లకు అండగా ఉంటామని ప్రకటించారు.
ఆపరేటర్ల నిరసనలు – రోడ్డెక్కిన వాహనదారులు
ఈ నిర్ణయాన్ని వ్యతిరేకిస్తూ రాష్ట్రవ్యాప్తంగా నిరసనలు మొదలయ్యాయి. రేషన్ ఇంటింటికీ అందించే వాహనాలను రద్దు చేస్తూ ప్రభుత్వం తీసుకున్న నిర్ణయాన్ని వ్యతిరేకిస్తూ ఆపరేటర్లు రోడ్డెక్కుతున్నారు. వివిధ జిల్లాలో ఈ మేరకు నిరసనలు చేపడుతున్నారు. ఇవాళ కోనసీమ జిల్లా కేంద్రం అమలాపురంలో రేషన్ వాహనాల ఆపరేటర్లు కలెక్టరేట్ వద్ద నిరసనకు దిగారు. రేషన్ వాహనాల రద్దు నిర్ణయాన్ని ప్రభుత్వం వెంటనే వెనక్కి తీసుకోవాలని డిమాండ్ చేశారు. ఈ మేరకు కలెక్టర్ కు వినతిపత్రం అందజేశారు.
Read also: Vallabhaneni Vamsi: వల్లభనేని వంశీ హెల్త్ బులిటెన్ విడుదల చేసిన అధికారులు
