వేసవి కాలం ఇంకా పూర్తిస్థాయిలో రాకముందే మామిడి మార్కెట్ వేడెక్కింది. సాధారణంగా సీజన్ మధ్యలో అందుబాటులోకి వచ్చే తోతాపురి (బంగనపల్లికి ప్రత్యామ్నాయ రకం) మామిడికి ఈసారి ప్రారంభంలోనే ఊహించని డిమాండ్ ఏర్పడింది. ఎన్టీఆర్ జిల్లా విస్సన్నపేట నుంచి ముంబై మార్కెట్కు ఎగుమతి అయిన తోతాపురి రకం మామిడికి టన్నుకు ఏకంగా రూ. 1,05,000 ధర లభించింది. అంటే కిలో సుమారు రూ. 100 పైనే పలకడం విశేషం. సీజన్ ఆరంభంలోనే ఈ స్థాయిలో రేట్లు రావడం మామిడి రైతులను ఆశ్చర్యంతో పాటు ఆనందంలో ముంచెత్తుతోంది.
Kerala: అనుమానాస్పద స్థితిలో మృతి చెందిన ఇన్ఫ్లుయెన్సర్
సాధారణంగా తోతాపురి రకాన్ని ఎక్కువగా జ్యూస్ తయారీ సంస్థలు (పల్ప్ ఇండస్ట్రీస్) కొనుగోలు చేస్తాయి. అయితే ప్రస్తుతం ఉత్తర భారతదేశంలో ఈ రకానికి టేబుల్ ఫ్రూట్గా (నేరుగా తినే పండుగా) విపరీతమైన డిమాండ్ పెరగడం ధరల పెరుగుదలకు ప్రధాన కారణమైంది. గతేడాది ఇదే సీజన్ చివరలో చిత్తూరు మార్కెట్లో టన్ను ధర కేవలం రూ. 12,000 నుండి రూ. 14,000 వరకు పడిపోయి రైతులను నష్టాల్లోకి నెట్టింది. కానీ, ఈ ఏడాది నిల్వలు తక్కువగా ఉండటం మరియు ముంబై వంటి మెట్రో నగరాల్లో డిమాండ్ ఎక్కువగా ఉండటంతో రికార్డు స్థాయి ధరలు నమోదవుతున్నాయి.
ప్రస్తుతం మార్కెట్లోకి వస్తున్న కాయలు నాణ్యత పరంగా బాగుండటం, ఎగుమతులకు అనుకూలమైన వాతావరణం ఉండటం విస్సన్నపేట ప్రాంత రైతన్నలకు వరంగా మారింది. సాధారణంగా తోతాపురి అంటే తక్కువ ధర వస్తుందనే అంచనాలను తలకిందులు చేస్తూ, ఇప్పుడు లక్ష రూపాయల మార్కును దాటడం ఒక రికార్డుగా వ్యాపారులు చెబుతున్నారు. ఇదే ధోరణి రానున్న నెలల్లో కూడా కొనసాగితే, గత కొన్నేళ్లుగా నష్టాల్లో ఉన్న మామిడి సాగుదారులు ఈసారి భారీ లాభాలను గడించే అవకాశం ఉంది.
Read hindi news: hindi.vaartha.com
Read Also Epaper : epaper.vaartha.com