ఆంధ్రప్రదేశ్ రాష్ట్రంలో పరిశ్రమల అభివృద్ధికి మరో కీలక ముందడుగు పడింది. కర్నూలు జిల్లాలోని ఓర్వకల్లులో ప్రైవేట్ ఎలక్ట్రిక్ వెహికల్ (ఈవీ) పార్కు ఏర్పాటు చేయనున్నారు. ఈ ప్రాజెక్టును పీపుల్ టెక్ ఎంటర్ప్రైజెస్ సంస్థ ప్రతిపాదించగా, నిన్న మంత్రి నారా లోకేశ్ సమక్షంలో ఈ ప్రాజెక్టుకు సంబంధించిన అవగాహన ఒప్పందం కుదుర్చుకున్నారు.
ఈ ప్రాజెక్టు కోసం సంస్థ రూ.1,800 కోట్ల భారీ పెట్టుబడిని ప్రతిపాదించింది. మొత్తం 1,200 ఎకరాల్లో ఈ పార్కును ఏర్పాటు చేయనున్నారు. ఈ ప్రాజెక్టు కేవలం రాష్ట్రానికి మాత్రమే కాకుండా, దేశవ్యాప్తంగా ఈవీ పరిశ్రమ అభివృద్ధికి కీలకమవుతుందని ప్రభుత్వ అధికారులు పేర్కొన్నారు. ఈవీ పార్కు నిర్మాణానికి వచ్చే మార్చి నెలలో శంకుస్థాపన చేయనున్నారు. ఈ సందర్భంగా పీపుల్ టెక్ ప్రతినిధులు మాట్లాడుతూ, పార్కు ఏర్పాటుకు సంబంధిత పనులు వేగంగా కొనసాగుతాయని, వచ్చే నాలుగేళ్లలో పూర్తి చేస్తామని తెలిపారు.
ఈ ప్రాజెక్టు ప్రారంభం తర్వాత, పీపుల్ టెక్ ఎంటర్ప్రైజెస్ వారి ఫ్యాక్టరీ నుంచి తొలి ఎలక్ట్రిక్ వెహికల్ బైక్ 2026 డిసెంబర్ నాటికి మార్కెట్లోకి వస్తుందని కంపెనీ ప్రతినిధులు వెల్లడించారు. ఈవీ టెక్నాలజీ అభివృద్ధి దిశగా ఈ ప్రాజెక్టు కీలక పాత్ర పోషించనుంది. ఈవీ పార్కు ఏర్పాటుతో రాష్ట్రానికి అనేక ఆర్థిక, పర్యావరణ ప్రయోజనాలు లభించనున్నాయి. పరిశ్రమలు, ఉపాధి అవకాశాలు పెరగడంతో పాటు, పర్యావరణాన్ని కాపాడే విధంగా శక్తివంతమైన ఈవీ వాహనాలను ఉత్పత్తి చేయడానికి ఈ ప్రాజెక్టు ఉపయుక్తంగా ఉంటుందని అధికార వర్గాలు విశ్వాసం వ్యక్తం చేశాయి.