డిప్యూటీ సీఎం పవన్ కళ్యాణ్ రెండు రోజుల పాటు అరకు ప్రాంతంలో పర్యటించనున్నారు. రేపు మరియు ఎల్లుండి గిరిజన గ్రామాల్లో పర్యటించేందుకు ఆయన ప్రణాళిక రూపొందించారు. గిరిజనులతో ప్రత్యక్షంగా మమేకమవుతూ వారి సమస్యలు, అవసరాలను తెలుసుకోవడం ఈ పర్యటన ప్రధాన ఉద్దేశ్యం. ఈ పర్యటనలో గ్రామాల అభివృద్ధికి సంబంధించిన పలు అంశాలపై ప్రజాప్రతినిధులతో కలిసి సమీక్ష జరపనున్నారు.
గిరిజన గ్రామాలకు బెటర్ కనెక్టివిటీ
ఈ పర్యటనలో భాగంగా పవన్ కళ్యాణ్ అక్కడి రోడ్ల పరిస్థితిని పరిశీలించనున్నారు. గిరిజన గ్రామాలకు బెటర్ కనెక్టివిటీ కల్పించేందుకు ఇప్పటికే చేపట్టిన రోడ్ల అభివృద్ధి పనులను పరిశీలించడంతో పాటు, కొత్తగా చేపట్టాల్సిన ప్రాజెక్టులకు సంబంధించి అధికారులతో చర్చించనున్నారు. వారి చొరవతోనే ఈ ప్రాంతానికి తగినంత ప్రాధాన్యత లభించినట్లు స్థానికులు భావిస్తున్నారు.
గిరిజన జనజీవితాన్ని దగ్గరగా చూసిన పవన్
అరకు వంటి అభివృద్ధి చెందని గిరిజన ప్రాంతాల్లో పరిస్థితిని మెరుగుపరచడమే లక్ష్యంగా పవన్ కళ్యాణ్ పర్యటన కొనసాగుతోంది. రోడ్లతో పాటు ఇతర మౌలిక సదుపాయాల కోసం నిధుల కేటాయింపు, వైద్య సేవల అందుబాటు, విద్యా సౌకర్యాలపై ప్రత్యేక దృష్టి పెట్టనున్నారు. ఈ పర్యటన ద్వారా గిరిజన జనజీవితాన్ని దగ్గర నుంచి అర్థం చేసుకుని, వారి అభివృద్ధికి దోహదపడే ప్రణాళికలు రూపొందించనున్నట్టు సమాచారం.