Pawan Kalyan: పవన్ కల్యాణ్ పై పేర్ని నాని ఫైర్

ఆంధ్రప్రదేశ్ ఉపముఖ్యమంత్రి పవన్ కల్యాణ్‌(Pawan Kalyan)పై వైఎస్సార్ కాంగ్రెస్ పార్టీ నేత, మాజీ మంత్రి పేర్ని నాని (Perni Nani) తీవ్ర విమర్శలు గుప్పించారు. సినిమా టికెట్ల ధరలపై పవన్ గతంలో చేసిన వ్యాఖ్యలను గుర్తు చేస్తూ, ఇప్పుడు అధికారంలోకి వచ్చిన తరువాత ఆయనే మాటల్ని మార్చారని ఆరోపించారు. అప్పట్లో “సినిమా మాది, మా ఇష్టం వచ్చిన ధరకు అమ్ముకుంటాం” అన్న పవన్… ఇప్పుడు థియేటర్ల యాజమాన్యాలను బెదిరించడం ఏంటని ప్రశ్నించారు. అధికారంలో ఒకలా, ప్రతిపక్షంలో మరోలా వ్యవహరించడం సబబుకాదని నిప్పులు చెరిగారు.

చిత్ర పరిశ్రమను బెదిరిస్తున్నారా?

సినిమా శాఖను చేపట్టి పరిశ్రమకు మేలు చేస్తానని చెప్పిన పవన్… ఇప్పుడు అదే పరిశ్రమపై చర్యలకు పాల్పడటం దారుణమని పేర్ని నాని (Perni Nani) ఆరోపించారు. థియేటర్ల యాజమాన్యాలపై విచారణలు, బెదిరింపులు, జైలుకు పంపిస్తామన్న హెచ్చరికలు ప్రభుత్వ స్థాయిలో ఉండడం అప్రస్తుతం అన్నారు. “ఒక ఫ్లాప్ సినిమా విడుదలకే ఈంత హడావుడా?” అంటూ విమర్శలు గుప్పించారు. సినిమా పరిశ్రమను ఇబ్బందిపెట్టే నిర్ణయాలు తీసుకోవడం ద్వారా ప్రజాస్వామ్యాన్ని దెబ్బతీయాలని చూస్తున్నారని ఆయన వ్యాఖ్యానించారు.

వైసీపీపై దూకుడు – సోమిరెడ్డిపై ఘాటు వ్యాఖ్యలు

వైసీపీకి అంత్యక్రియలు చేస్తామంటూ మంత్రి సోమిరెడ్డి చేసిన వ్యాఖ్యలపై కూడా పేర్ని నాని ఘాటుగా స్పందించారు. “అంత్యక్రియలు చేయడం మీకు వెన్నతో పెట్టిన విద్య. ఎన్టీఆర్‌కే వెన్నుపోటు పొడిచిన ఘనత మీకే” అని ఎద్దేవా చేశారు. మంత్రి పదవి రాలేదని బాధపడుతూ ఇలా విమర్శలు చేయడం బాధకరం అని అన్నారు. వాసంశెట్టి సుభాష్‌ను “పిల్ల గాడిద” అని సంబోధిస్తూ, ఆయన రాజకీయ వైఖరిని కూడా వ్యంగ్యంగా విమర్శించారు. ఈ మొత్తం వ్యవహారం రాజకీయంగా తీవ్ర చర్చనీయాంశంగా మారింది.