రాష్ట్రంలోని మద్యం దుకాణాల్లో ప్రభుత్వం నిర్ణయించిన ధరల (MRP) కంటే ఎక్కువ వసూలు చేస్తున్నారన్న ఫిర్యాదులపై డిప్యూటీ సీఎం పవన్ కల్యాణ్ తీవ్ర ఆగ్రహం వ్యక్తం చేశారు. సామాన్య ప్రజలను దోచుకోవడం నిబంధనలకు విరుద్ధమని, ఇటువంటి చర్యలు ప్రభుత్వ ప్రతిష్టను దిగజార్చుతాయని ఆయన స్పష్టం చేశారు. ముఖ్యంగా కాకినాడ జిల్లాతో పాటు రాష్ట్రవ్యాప్తంగా అనేక ప్రాంతాల నుండి విక్రయదారులు అదనపు వసూళ్లకు పాల్పడుతున్నట్లు ఆధారాలతో సహా ఫిర్యాదులు అందాయని, దుకాణదారులు తమ పద్ధతి మార్చుకోకపోతే కఠిన పర్యవసానాలు ఎదుర్కోవాల్సి ఉంటుందని ఆయన సోషల్ మీడియా వేదికగా హెచ్చరించారు.
Ambati Rambabu: వైసీపీ నేత ఇంటిపై దాడి..31 మందిపై కేసు నమోదు
మద్యం విక్రయాల్లో పారదర్శకతను పెంపొందించేందుకు ఎక్సైజ్ శాఖ అధికారులకు పవన్ కల్యాణ్ కీలక ఆదేశాలు జారీ చేశారు. ప్రతి మద్యం దుకాణంపై నిరంతర నిఘా ఉంచాలని, ఆకస్మిక తనిఖీలు (Surprise Raids) నిర్వహించాలని సూచించారు. ఎంఆర్పీ కంటే ఒక్క రూపాయి ఎక్కువ వసూలు చేసినా సదరు దుకాణదారులపై చర్యలు తీసుకోవడమే కాకుండా, అవసరమైతే లైసెన్స్లను రద్దు చేసే దిశగా అడుగులు వేయాలని ఆదేశించారు. విక్రయాల వద్ద ధరల పట్టికను స్పష్టంగా ప్రదర్శించడం మరియు ప్రతి కొనుగోలుకు రశీదు ఇచ్చే విధానాన్ని పక్కాగా అమలు చేయాలని ఆయన కోరారు.
గతంలో మద్యం విషయంలో జరిగిన అక్రమాలను ప్రక్షాళన చేయడమే లక్ష్యంగా కూటమి ప్రభుత్వం కొత్త మద్యం విధానాన్ని తెచ్చిందని, దానిని నీరుగార్చే ప్రయత్నం ఎవరూ చేయకూడదని పవన్ పేర్కొన్నారు. క్షేత్రస్థాయిలో అధికారులు కూడా బాధ్యతాయుతంగా వ్యవహరించాలని, ఎక్కడైనా అవినీతికి తావుంటే అధికారులపై కూడా వేటు తప్పదని పరోక్షంగా హెచ్చరించారు. ఈ కఠిన వైఖరితో మద్యం సిండికేట్ల ఆగడాలకు చెక్ పడుతుందని ప్రజలు ఆశిస్తున్నారు. ప్రజా ప్రయోజనాలే పరమావధిగా ప్రభుత్వం పనిచేస్తుందని, ఎవరైనా చట్టాన్ని అతిక్రమిస్తే ఉపేక్షించేది లేదని ఈ సందర్భంగా ఆయన పునరుద్ఘాటించారు.
Read hindi news: hindi.vaartha.com
Read Also Epaper : epaper.vaartha.com
