ఆంధ్రప్రదేశ్ రాష్ట్రంలో క్లీన్ ఎనర్జీ రంగం తర్వాత ఇప్పుడు హెల్త్ అండ్ స్పిరిట్యువల్ టూరిజం రంగంలో కూడా భారీ పెట్టుబడులకు మార్గం సుగమమైంది. ప్రముఖ సంస్థ పతంజలి గ్రూప్, యోగా గురువు బాబా రామ్దేవ్ ఆధ్వర్యంలో, విశాఖపట్నంలోని ఎండాడ వద్ద రూ. 118 కోట్ల వ్యయంతో ఒక అత్యాధునిక వెల్నెస్ హబ్ను ఏర్పాటు చేయనుంది. ఆంధ్రప్రదేశ్ ప్రభుత్వం రూపొందించిన హెల్త్ అండ్ స్పిరిట్చువల్ టూరిజం సర్క్యూట్ స్ట్రాటజీలో భాగంగా ఏర్పాటు కానున్న తొలి ప్రైవేట్ ప్రాజెక్టు ఇదే కావడం విశేషం. ఈ కేంద్రం పతంజలి సంస్థ దక్షిణ భారతదేశంలో ఏర్పాటు చేస్తున్న మొట్టమొదటి వెల్నెస్ హబ్ కూడా కానుంది. ఈ ప్రాజెక్టు ఏర్పాటుకు ఏపీ టూరిజం ల్యాండ్ అలాట్మెంట్ పాలసీ 2024-29 కింద ఇప్పటికే అనుమతి లభించింది.
Breaking news: విమాన రద్దులపై ఇండిగో కీలక స్పష్టం
పతంజలి సంస్థ ఎండాడలో 5 ఎకరాల విస్తీర్ణంలో ఈ వెల్నెస్ సెంటర్ను ఏర్పాటు చేయనుంది. దీనిని 30 నెలల్లోగా ప్రజలకు అందుబాటులోకి తీసుకురావాలని లక్ష్యంగా పెట్టుకున్నారు. ఈ భారీ ప్రాజెక్టు ద్వారా ప్రత్యక్షంగా, పరోక్షంగా సుమారు 2,750 మందికి ఉపాధి అవకాశాలు లభిస్తాయని అధికారులు అంచనా వేస్తున్నారు (250 మందికి ప్రత్యక్షంగా, 2,500 మందికి పరోక్షంగా). ఈ వెల్నెస్ హబ్లో ముఖ్యంగా ఆయుర్వేదం, యోగా, పంచకర్మ, ఆక్యుప్రెషర్, నేచురోపతి వంటి సంపూర్ణ ఆరోగ్య సేవలు అందించబడతాయి. ఈ హబ్ ఏర్పాటుతో విశాఖపట్నాన్ని హెల్త్ టూరిజం హబ్గా మార్చాలనే ఆంధ్రప్రదేశ్ ప్రభుత్వ లక్ష్యానికి బలం చేకూరుతుంది.
ఏపీ ప్రభుత్వం 2028 నాటికల్లా టూరిజం రంగంలో రూ. 25,000 కోట్ల పెట్టుబడులు తీసుకురావాలనే లక్ష్యంతో కొత్త టూరిజం పాలసీని ప్రకటించింది. ఇందులో భాగంగా, తీర ప్రాంతం వెంబడి ఆరోగ్య, ఆధ్యాత్మిక పర్యాటక సర్క్యూట్లను ప్రోత్సహిస్తోంది, ముఖ్యంగా శ్రీకాకుళం-విశాఖపట్నం సర్క్యూట్పై దృష్టి సారించింది. అంతేకాకుండా, సింహాచలం, శ్రీశైలం, తిరుపతి, అన్నవరం వంటి పది ప్రముఖ ఆలయాల వద్ద టెంపుల్ టూరిజాన్ని ప్రోత్సహించడానికి ప్రణాళికలు రచిస్తోంది. పతంజలి వెల్నెస్ హబ్ ద్వారా లభించే ఆయుర్వేద మరియు ఆధ్యాత్మిక సేవలు, ప్రభుత్వం ప్రణాళిక చేస్తున్న ఈ టూరిజం సర్క్యూట్లకు మరింత ఆకర్షణను జోడించి, రాష్ట్రానికి పర్యాటకుల రాకను గణనీయంగా పెంచే అవకాశం ఉంది.
Read hindi news: https://hindi.vaartha.com
Epaper : https://epaper.vaartha.com/