News Telugu: రాబోయే 2027 గోదావరి పుష్కరాల (Godavari Pushkar) కోసం ముందుగానే సక్రమమైన ఏర్పాట్లు చేయాలని పురపాలక మరియు పట్టణాభివృద్ధి శాఖ మంత్రి పొంగూరు నారాయణ అధికారులను ఆదేశించారు. ఈ సందర్భంగా ఆయన రాజమండ్రి నగరపాలక సంస్థ కార్యాలయంలో జిల్లా కలెక్టర్ పి. ప్రశాంతితో కలిసి రుడా మాస్టర్ ప్లాన్, పుష్కరాల సన్నాహకాలపై సమీక్ష నిర్వహించారు.
యాత్రికుల సౌకర్యాలపై దృష్టి
పుష్కరాల సందర్భంగా యాత్రికులకు ఎటువంటి ఇబ్బందులు రాకుండా రోడ్ల అభివృద్ధి, ప్రత్యేక మార్గాల ఏర్పాటు, ఘాట్ల వద్ద ఆధునిక సదుపాయాలు, పారిశుద్ధ్యం, భద్రతా చర్యలు చేపట్టాలని మంత్రి సూచించారు. అలాగే హోటల్ మేనేజ్మెంట్, రెస్టారెంట్లు మరియు సేవల రంగంలో పీపీపీ విధానంలో భాగస్వామ్యాలను ఆహ్వానిస్తున్నట్లు వెల్లడించారు.
మాస్టర్ ప్లాన్ సమీక్ష
రాజమండ్రి (Rajahmundry) అర్బన్ డెవలప్మెంట్ అథారిటీ (రుడా) పరిధిలో మౌలిక వసతుల అభివృద్ధికి ప్రాధాన్యం ఇవ్వాలని మంత్రి నారాయణ ఆదేశించారు. మొత్తం 3,156 చదరపు కిలోమీటర్ల విస్తీర్ణంలో మాస్టర్ ప్లాన్ రూపొందించాల్సి ఉండగా, ప్రస్తుతం 1,005 చదరపు కిలోమీటర్లకు మాత్రమే డ్రాఫ్ట్ సిద్ధమైందని అధికారులు తెలియజేశారు. మిగిలిన ప్రాంతాలను కూడా చేర్చుతూ సమగ్ర మాస్టర్ ప్లాన్ పూర్తి చేయాలని ఆయన సూచించారు.
స్థానిక సంస్థల ఆదాయం – అభివృద్ధికే వినియోగం
రుడా పరిధిలోని పంచాయతీలు, మునిసిపాలిటీల నుంచి వచ్చే ఆదాయం వాటి అభివృద్ధికే ఖర్చు చేయాలని మంత్రి స్పష్టం చేశారు. రోడ్లు, డ్రైనేజీ, త్రాగునీరు, వీధి దీపాలు వంటి కనీస మౌలిక సదుపాయాలపై ప్రత్యేక దృష్టి పెట్టాలని సూచించారు.
ల్యాండ్ బ్యాంక్ ఏర్పాటు దిశగా చర్యలు
రుడా పరిధిలోని ప్రభుత్వ, ప్రైవేటు భూములను గుర్తించి ల్యాండ్ బ్యాంక్ ఏర్పాటు చేయాలని మంత్రి సూచించారు. తద్వారా ఈ భూములను పీపీపీ విధానంలో అభివృద్ధి చేసి, స్థానిక సంస్థలకు ఆదాయం సమకూర్చే అవకాశాన్ని కల్పించవచ్చని తెలిపారు.
సమావేశంలో పాల్గొన్న అధికారులు
ఈ సమీక్ష సమావేశంలో రుడా వైస్ ఛైర్మన్, జాయింట్ కలెక్టర్ ఎస్. చిన్న రాముడు, సెక్రటరీ ఎం.వి.ఆర్. సాయిబాబ, చీఫ్ ప్లానింగ్ ఆఫీసర్ జి.వి.ఎస్.ఎన్. మూర్తి, ప్లానింగ్ ఆఫీసర్ ఎన్. శ్రీనివాస్ తో పాటు ఇతర అధికారులు హాజరయ్యారు.
Read hindi news: hindi.vaartha.com
Read also:
