ఆంధ్రప్రదేశ్ ప్రభుత్వం చిత్తూరు (Chittoor)జిల్లాలో ఒక కొత్త విశ్వవిద్యాలయం ఏర్పాటును పరిశీలిస్తున్నట్లు రాష్ట్ర ఐటీ మరియు విద్యాశాఖ మంత్రి నారా లోకేశ్ వెల్లడించారు. శాసనసభలో బుధవారం జరిగిన ప్రశ్నోత్తరాల సందర్భంగా ఆయన ఈ విషయాన్ని ప్రకటించారు.
ఎమ్మెల్యే జగన్మోహన్ అడిగిన ప్రశ్నకు మంత్రి సమాధానం
చిత్తూరు నియోజకవర్గ ఎమ్మెల్యే గురజాల జగన్మోహన్ రావు (Gurajala Jaganmohan Rao)అడిగిన ప్రశ్నకు స్పందించిన లోకేశ్ గారు, గత సంవత్సరం నవంబరులోనే ఆయన ప్రభుత్వం దృష్టికి ఈ అంశాన్ని తీసుకెళ్లిన విషయాన్ని గుర్తుచేశారు. చిత్తూరు జిల్లాలో ప్రస్తుతం ప్రభుత్వ రంగంలో ద్రవిడియన్ విశ్వవిద్యాలయం, ప్రైవేటు రంగంలో అపోలో విశ్వవిద్యాలయం మాత్రమే ఉన్నాయని తెలిపారు.
ప్రతి జిల్లాకు ఒక వర్సిటీ – సీఎం చంద్రబాబు దృష్టి
ప్రస్తుతం రాష్ట్ర ప్రభుత్వం ప్రతీ జిల్లాలోనూ కనీసం ఒక ప్రభుత్వ లేదా ప్రైవేటు విశ్వవిద్యాలయం ఉండేలా చర్యలు తీసుకుంటున్నదని మంత్రి తెలిపారు. ముఖ్యమంత్రి నారా చంద్రబాబు నాయుడు దృష్టిలో ఇదే ఉన్నదని చెప్పారు. ద్రవిడియన్ వర్సిటీ ప్రధానంగా భాషా అధ్యయనానికి కేంద్రీకృతమైనదిగా ఉండటంతో, సాధారణ విద్య కోసం మరో విశ్వవిద్యాలయం అవసరమని పేర్కొన్నారు.
“చిత్తూరులో మరో విశ్వవిద్యాలయం తప్పనిసరి” – లోకేశ్ హామీ
ఇది జిల్లా యువతకు అధిక అవకాశాలు కల్పించడమే కాకుండా, స్థానిక విద్యాభివృద్ధికి దోహదపడుతుందని నారా లోకేశ్ అభిప్రాయపడ్డారు. అన్ని ముంపు పార్టీల ప్రజా ప్రతినిధుల సహకారంతో ఈ వర్సిటీ ఏర్పాటు జరగాలన్నదే ప్రభుత్వ ఉద్దేశమని స్పష్టం చేశారు.
తుని నియోజకవర్గానికి జూనియర్ కళాశాల – మంత్రి హామీ
అదే సభలో తుని ఎమ్మెల్యే యనమల దివ్య తన నియోజకవర్గంలోని రావికంపాడులో ఉన్న ఉన్నత పాఠశాలను జూనియర్ కళాశాలగా మారుస్తే మంచిదని విజ్ఞప్తి చేశారు. దీనిపై సానుకూలంగా స్పందించిన లోకేశ్, తగిన సమాచారం సేకరించి త్వరలో నిర్ణయం తీసుకుంటామని చెప్పారు.
‘హైస్కూల్ ప్లస్’ విధానం పట్ల లోకేశ్ విమర్శ
గత ప్రభుత్వ హైస్కూల్ ప్లస్ విధానం వల్ల ప్రభుత్వ జూనియర్ కళాశాలలు నష్టపోయాయని మంత్రి విమర్శించారు. ఈ విధానం వల్ల సబ్జెక్టు అధ్యాపకుల కొరత ఏర్పడిందని, విద్యార్థుల భవిష్యత్తుపై ప్రతికూల ప్రభావం పడిందని చెప్పారు.
ప్రభుత్వ కళాశాలల అభివృద్ధికి ప్రత్యేక దృష్టి
తమ ప్రభుత్వం అధికారంలోకి వచ్చిన తర్వాత విద్యా వ్యవస్థను పునరుద్ధరించేందుకు చర్యలు తీసుకున్నట్టు లోకేశ్ వెల్లడించారు. ఫలితంగా, ప్రభుత్వ జూనియర్ కళాశాలల్లో అడ్మిషన్లు 40% వరకు పెరిగాయని తెలిపారు. విద్యార్థులకు మధ్యాహ్న భోజనం, పోటీ పరీక్షల మెటీరియల్ వంటి సదుపాయాలు కూడా అందిస్తున్నట్టు పేర్కొన్నారు.
రాబోయే రెండేళ్లలో ప్రతి మండలానికి జూనియర్ కళాశాల లక్ష్యం
ప్రతి మండలానికి కనీసం ఒక జూనియర్ కళాశాల ఉండేలా చేయడమే తమ ప్రభుత్వ ధ్యేయమని నారా లోకేశ్ ప్రకటించారు. వచ్చే రెండు సంవత్సరాల్లో ఈ లక్ష్యాన్ని సాధించేందుకు పటిష్టమైన కార్యాచరణను అమలు చేస్తామని హామీ ఇచ్చారు.
Read hindi news: hindi.vaartha.com
Read Also: