ఆంధ్రప్రదేశ్లో కూటమి ప్రభుత్వం అధికారంలోకి వచ్చిన తరువాత ప్రారంభించిన ఎన్టీఆర్ భరోసా పథకం (NTR Bharosa Scheme) ద్వారా ప్రతి నెలా పెన్షన్ల పంపిణీ కొనసాగుతోంది. సెప్టెంబర్ 1న రాష్ట్రవ్యాప్తంగా ఈ పథకం కింద 63.61 లక్షల మంది లబ్ధిదారులకు రూ. 2,746.52 కోట్లు విడుదల చేశారు. ఈ విస్తృత కార్యక్రమాన్ని పురస్కరించుకుని, పలు జిల్లాల్లో మంత్రులు ప్రత్యక్షంగా పాల్గొన్నారు.
తెనాలిలో మంత్రి నాదెండ్ల మనోహర్ స్వయంగా పంపిణీ
గుంటూరు జిల్లా తెనాలి నియోజకవర్గంలోని జాగర్లమూడి గ్రామంలోని సుల్తానాబాద్ కాలనీలో మంత్రి నాదెండ్ల మనోహర్ లబ్ధిదారుల ఇళ్లకు స్వయంగా వెళ్లి పెన్షన్లు (Pensions)అందించారు. ప్రభుత్వం తీసుకొచ్చిన పారదర్శక విధానంలో భాగంగా, పెన్షన్ డబ్బులు నేరుగా ఇంటికే ఇచ్చే కార్యక్రమాన్ని మంత్రి స్వయంగా పరిశీలించారు.
పెన్షన్ అమౌంట్ పెంపు–ప్రభుత్వ హామీకి అమలు
ఈ సందర్భంగా మంత్రి మాట్లాడుతూ, కూటమి ప్రభుత్వం ఎన్నికల సమయంలో ఇచ్చిన హామీ ప్రకారం, సాధారణ వృద్ధాప్య పెన్షన్ను రూ. 2,000 నుంచి రూ. 4,000కి పెంచినట్టు తెలిపారు. అదేవిధంగా, దివ్యాంగులకు వారి అర్హత ఆధారంగా రూ. 6,000, రూ. 10,000, రూ. 15,000 పెన్షన్ మంజూరైనదని చెప్పారు. తెనాలిలో మాత్రమే 35,563 లబ్ధిదారులకు రూ. 14.99 కోట్లు పంపిణీ చేసినట్టు వివరించారు.
సామాజిక భద్రతే లక్ష్యం: మంత్రి స్పష్టం
వృద్ధులు, వితంతువులు, ఒంటరి మహిళలు, దివ్యాంగుల వంటి నిస్సహాయ వర్గాల కోసం ఎన్టీఆర్ భరోసా పథకాన్ని ప్రత్యేకంగా రూపొందించామని మంత్రి తెలిపారు. దేశంలోనే పెన్షన్లపై అత్యధికంగా వ్యయం చేస్తున్న రాష్ట్రం ఆంధ్రప్రదేశ్ అని చెప్పారు. అర్హులైన వారు తమ పేర్లను నమోదు చేసుకోవాలని, కొత్తగా దరఖాస్తు చేసిన వారికి త్వరలోనే పెన్షన్లు మంజూరు చేస్తామని హామీ ఇచ్చారు.
అభివృద్ధి పనులకు హామీ – రేషన్ పంపిణీ పై అప్డేట్లు
ఈ పర్యటనలో భాగంగా జాగర్లమూడిలో సదరం క్యాంప్, పాఠశాల భవనం, పంచాయతీ కార్యాలయం, రహదారుల నిర్మాణం వంటి అభివృద్ధి పనులకు మంత్రి హామీ ఇచ్చారు. అదేవిధంగా ఈ నెలలో స్వచ్ఛ ఆంధ్ర కార్యక్రమాన్ని నిర్వహించి, కాలువల ఆధునీకరణ, శుద్ధమైన మంచినీటి సరఫరాపై చర్యలు తీసుకుంటామని పేర్కొన్నారు. రేషన్ సరఫరా విషయంలో కూడా ఇంటికే పంపిణీ, త్వరలో స్మార్ట్ రేషన్ కార్డుల జారీ వంటి విషయాలను ప్రజలకు వివరించారు.
నిమ్మ రైతులకు భరోసా
జాగర్లమూడి పరిధిలో ఉన్న నిమ్మ రైతులు ఎదుర్కొంటున్న సమస్యలపై స్పందించిన మంత్రి, ప్రభుత్వం వారి వెంటే ఉంటుందని, అవసరమైన మద్దతును అందిస్తామని భరోసా ఇచ్చారు.
Read hindi news:hindi.vaartha.com
Read also: