దేశ రక్షణ కోసం ప్రాణత్యాగం చేసిన ప్రతి సైనికుడికి భారత దేశం గౌరవం ఇవ్వడం ఒక బాధ్యత మాత్రమే కాకుండా, ఒక ఋణం. అలాంటి ఉదాహరణే శ్రీ సత్యసాయి జిల్లా, గోరంట్ల మండలం కళ్లితండాకు చెందిన మురళీ నాయక్. దేశం కోసం పోరాడుతూ తన జీవితాన్ని అర్పించిన ఆయన సాహసం ప్రజలందరినీ గర్వపడేలా చేసింది.
నివాళులర్పించిన మంత్రి నారా లోకేశ్
పోలవరం ప్రాజెక్టు పనుల నడుమ, మురళీనాయక్ భౌతికకాయాన్ని చూసేందుకు, ఆయన కుటుంబాన్ని పరామర్శించేందుకు మంత్రి నారా లోకేశ్ తక్షణమే కళ్లితండాకు చేరుకున్నారు. అక్కడ మురళీనాయక్ తల్లిదండ్రులను కలుసుకుని వారిని ఓదార్చారు. తాను మాత్రమే కాదు, రాష్ట్ర ప్రభుత్వం మొత్తం మురళీనాయక్ కుటుంబానికి అండగా ఉంటుందని భరోసా ఇచ్చారు.
సాయంతో అండగా ప్రభుత్వం
మురళీ నాయక్ కుటుంబానికి ₹50 లక్షలతో పాటు ఇల్లు నిర్మించుకునేందుకు 300 గజాల స్థలం, 5 ఎకరాల వ్యవసాయ భూమి, మరియు ఆయన తండ్రికి ప్రభుత్వ ఉద్యోగం కూడా ఇవ్వనున్నట్లు నారా లోకేశ్ వెల్లడించారు. వీటన్నింటి ద్వారా కుటుంబం ఆర్థికంగా నిలదొక్కుకునేలా చూస్తామని భరోసా ఇచ్చారు. ఒక అభయంగా ప్రభుత్వం అండగా ఉంటుందని స్పష్టం చేశారు.
మురళీనాయక్ త్యాగం
మురళీ నాయక్ చిన్నప్పటి నుంచే దేశానికి సేవ చేయాలనే తపనతో సైన్యంలో చేరి అగ్నిపథ్ పథకం కింద అగ్నివీర్గా సేవలందించారు. ఈ సందర్భంగా లోకేశ్ మాట్లాడుతూ దేశం కోసం ప్రాణాలర్పించిన వీరజవాన్ మురళీ నాయక్ కుటుంబానికి కేంద్ర, రాష్ట్ర ప్రభుత్వాలు అండగా ఉంటాయని భరోసా ఇచ్చారు. దేశ సరిహద్దుల్లో పాకిస్థాన్తో పోరాడుతూ మురళీ నాయక్ వీరమరణం పొందారని అన్నారు. మురళి చిన్నప్పటి నుంచి సైనికుడు కావాలని కలలు కన్నారని పేర్కొన్నారు. తాను చనిపోతే జాతీయ జెండా కప్పుకునే చనిపోతానని మురళీ నాయక్ అన్నారని చెప్పారు. సరిహద్దుల్లో సైనికుల త్యాగాల వల్లే మనం సురక్షితంగా ఉండగలుగుతున్నామని పేర్కొన్నారు. చిన్నవయసులోనే అగ్నివీర్ మురళీ నాయక్ చనిపోవడం బాధాకరమని అన్నారు.
అధికార లాంఛనాలతో అంత్యక్రియలు
నారా లోకేశ్తో పాటు, మంత్రులు అనగాని సత్యప్రసాద్, వంగలపూడి అనిత, సవిత, ఎంపీ బీకే పార్థసారథి, మాజీ మంత్రులు పల్లె రఘునాథరెడ్డి, కాలవ శ్రీనివాసులు, ఎమ్మెల్యేలు పల్లె సింధూరారెడ్డి, ఎంఎస్ రాజు, టీడీపీ సీనియర్ నేత జేసీ ప్రభాకర్ రెడ్డి తదితరులు నివాళులు అర్పించారు. ఈ రోజు ప్రభుత్వ అధికార లాంఛనాలతో మురళీ నాయక్ అంతక్రియలను ప్రభుత్వం నిర్వహించనుంది.
Read also: Balakrishna: వీరజవాన్ మురళీ నాయక్ కుటుంబానికి బాలకృష్ణ అండ