ఆంధ్రప్రదేశ్లో రాజకీయ వర్గాలను, ప్రజలను కుదిపేస్తున్న లిక్కర్ స్కాం కేసు(Liquor scam)లో మరోసారి కీలక పరిణామం చోటుచేసుకుంది. ఈ కేసులో జైలులో ఉన్న 8 మంది నిందితుల రిమాండ్ను విజయవాడ ఏసీబీ కోర్టు ఈ నెల 26 వరకు పొడిగించింది. నేటితో రిమాండ్ గడువు ముగియడంతో సిట్ అధికారులు వారిని కోర్టులో హాజరుపరిచారు. విచారణ అనంతరం కోర్టు రిమాండ్ పొడిగిస్తూ ఆదేశాలు జారీ చేసింది. ఈ నిర్ణయంతో కేసు మరింత వేగం పుంజుకునే అవకాశం ఉందని న్యాయ వర్గాలు భావిస్తున్నాయి.
గత కొన్ని నెలలుగా రాష్ట్రంలో సంచలనం రేపిన ఈ లిక్కర్ స్కాం కేసులో ఇప్పటివరకు 12 మంది నిందితులను అరెస్ట్ చేసిన విషయం తెలిసిందే. వారిలో నలుగురు ఇప్పటికే బెయిల్పై విడుదలయ్యారు. మిగిలిన ఎనిమిది మంది నిందితులు జైలులోనే కొనసాగుతున్నారు. కేసు విచారణలో భాగంగా సిట్ అనేక ఆర్థిక లావాదేవీలను, రాజకీయ అనుబంధాలను పరిశీలిస్తూ సాక్ష్యాలను సేకరిస్తోంది. ఈ కేసులో లిక్కర్ కాంట్రాక్టులు, అక్రమ ఒప్పందాలు, నల్లధన ప్రవాహం వంటి అంశాలు ప్రధానంగా వెలుగులోకి రావడంతో రాష్ట్రవ్యాప్తంగా చర్చనీయాంశమైంది.
ప్రస్తుతం రిమాండ్లో కొనసాగుతున్న నిందితులపై మరిన్ని విచారణలు జరగనున్నాయి. సిట్ ఇప్పటికే కొన్ని ముఖ్యమైన వ్యక్తుల వాంగ్మూలాలను రికార్డు చేసింది. నిందితులు ఇచ్చిన సమాచారం ఆధారంగా ఇంకా పెద్ద మలుపులు తిరిగే అవకాశం ఉందని భావిస్తున్నారు. కోర్టు ఆదేశాల మేరకు రిమాండ్ పొడిగింపుతో, ఈ కేసు మరింత గంభీర దశకు చేరిందని చెప్పొచ్చు. రాష్ట్ర రాజకీయాలపై కూడా ఈ స్కాం ప్రభావం పడే అవకాశముండటంతో, రాబోయే రోజుల్లో మరిన్ని సంచలన విషయాలు వెలుగులోకి రావచ్చని విశ్లేషకులు అంచనా వేస్తున్నారు.