వైసీపీ అధినేత వైఎస్ జగన్ మోహన్ రెడ్డి నేటి నుంచి మూడు రోజుల పాటు కడప జిల్లా పులివెందుల నియోజకవర్గంలో పర్యటించనున్నారు. ఈరోజు మధ్యాహ్నం బయలుదేరి సాయంత్రం 4 గంటలకు ఆయన పులివెందుల చేరుకుంటారు. అక్కడి భాకరాపురంలోని తన క్యాంప్ కార్యాలయంలో స్థానిక ప్రజలు, పార్టీ కార్యకర్తలతో భేటీ అవుతారు. ఈ పర్యటనలో భాగంగా ఆయన ముఖ్యంగా ‘ప్రజాదర్బార్’ నిర్వహించి, ప్రజల సమస్యలను స్వయంగా తెలుసుకోనున్నారు. అధికారంలో లేకపోయినా తన నియోజకవర్గ ప్రజలకు అందుబాటులో ఉండాలనే ఉద్దేశంతో ఈ పర్యటనను ప్లాన్ చేసినట్లు పార్టీ వర్గాలు వెల్లడించాయి.
TG Politics: తెలంగాణ పరిషత్ ఎన్నికలపై సీఎం రేవంత్ మంత్రుల భేటీ
డిసెంబర్ 24వ తేదీన జగన్ తన తండ్రి దివంగత వైఎస్ రాజశేఖర్ రెడ్డి సమాధి ఉన్న ఇడుపులపాయకు వెళ్తారు. అక్కడ క్రిస్మస్ పండుగను పురస్కరించుకుని నిర్వహించే ప్రత్యేక ప్రార్థనల్లో కుటుంబ సభ్యులతో కలిసి పాల్గొంటారు. అనంతరం మధ్యాహ్నం 1 గంటకు తిరిగి పులివెందుల చేరుకుని, రెండోసారి ప్రజాదర్బార్లో పాల్గొంటారు. నియోజకవర్గ అభివృద్ధి పనులు మరియు స్థానిక రాజకీయ పరిణామాలపై నాయకులతో చర్చలు జరుపుతారు. పార్టీ కేడర్లో ఉత్సాహం నింపేందుకు ఈ పర్యటన దోహదపడుతుందని వైసీపీ శ్రేణులు భావిస్తున్నాయి.
పర్యటన చివరి రోజైన డిసెంబర్ 25న (క్రిస్మస్ పండుగ రోజు), జగన్ ఉదయం 8:30 గంటలకు పులివెందులలోని సి.ఎస్.ఐ (CSI) చర్చిలో జరిగే క్రిస్మస్ వేడుకలకు హాజరవుతారు. అక్కడ ప్రత్యేక ప్రార్థనలు నిర్వహించి, నియోజకవర్గ ప్రజలకు పండుగ శుభాకాంక్షలు తెలియజేస్తారు. వేడుకల అనంతరం ఉదయం 10:30 గంటలకు పులివెందుల నుంచి తిరుగుపయనమవుతారు. క్రిస్మస్ పండుగను ప్రతి ఏటా తన సొంత నియోజకవర్గ ప్రజల మధ్య జరుపుకోవడం జగన్ కుటుంబానికి ఆనవాయితీగా వస్తోంది, ఈ ఏడాది కూడా అదే సంప్రదాయాన్ని ఆయన కొనసాగిస్తున్నారు.
Read hindi news: hindi.vaartha.com
Epaper : epaper.vaartha.com