ఆంధ్రప్రదేశ్ ముఖ్యమంత్రి ఎన్. చంద్రబాబు నాయుడు రాష్ట్ర ఆర్థిక పరిస్థితులను వివరిస్తూ గత పరిపాలన నుండి వచ్చిన తీవ్రమైన సవాళ్లను నొక్కిచెప్పారు. వైఎస్ఆర్ కాంగ్రెస్ పార్టీ హయాంలో ఆంధ్రప్రదేశ్ ఆర్థిక పరిస్థితి బీహార్ కంటే దారుణంగా దిగజారిపోయిందన్నారు. రాష్ట్ర అభివృద్ధి కార్యక్రమాలను ప్రస్తావిస్తూ, విశాఖ స్టీల్ ప్లాంట్, అమరావతి రాజధాని ప్రాజెక్టు, పోలవరం సాగునీటి ప్రాజెక్టు వంటి కార్యక్రమాలకు కేంద్ర ప్రభుత్వం నిధులు కేటాయించిందని చంద్రబాబు పేర్కొన్నారు. తగినంత ఆర్థిక వనరులు అందుబాటులో లేకపోయినా సంక్షేమ పథకాలను జాప్యం లేకుండా అమలు చేస్తాం అని చెప్పారు. అయితే, నిర్దిష్ట కేంద్ర ప్రభుత్వ ప్రాజెక్టుల కోసం ఉద్దేశించిన నిధులను తిరిగి కేటాయించడం ఎంపిక కాదని ఆయన స్పష్టం చేశారు.
వాగ్దానాలను ఉల్లంఘించడం నాకు ఇష్టం లేదు. అందుకే నిజాన్ని ప్రజలతో పంచుకుంటున్నాను అని అయన అన్నారు. ప్రస్తుతం ఆర్థిక పరిస్థితి అనుకూలంగా లేదు. అయితే ఆర్థిక వ్యవస్థ పుంజుకున్న వెంటనే సంక్షేమ పథకాలను అమలు చేస్తాం అని అయన వివరించారు. ఈ వాగ్దానాలను నెరవేర్చడానికి రుణాలు పొందాల్సిన అవసరం ఉన్నప్పటికీ, హామీలను నెరవేర్చడానికి తన అంకితభావాన్ని పునరుద్ఘాటించారు.
గత ఐదేళ్లలో 2019 నుండి వృద్ధి రేటును కొనసాగించినట్లయితే, రాష్ట్ర సంపద గణనీయంగా పెరిగి ఉండేది అని చెప్పారు. బదులుగా, ఇప్పుడు రాష్ట్రంపై ₹9.5 లక్షల కోట్ల అప్పుల భారం పడిందని, ఆ రుణాలపై వడ్డీ చెల్లించే బాధ్యత కూడా ఉందని ఆయన వివరించారు. వ్యవస్థల పునరుద్ధరణతో పాటు అన్ని రంగాలకు సుస్థిరత తీసుకురావడానికి తమ ప్రభుత్వం కృషి చేస్తోందని సంక్షేమ కార్యక్రమాల్లో ఎట్టి పరిస్థితుల్లోనూ రాజీపడబోమని ప్రజలకు భరోసా ఇచ్చారు. సంక్షేమ పథకాల అమలు విషయంలో మేం ఒక్క అడుగు కూడా వెనక్కి వేయమని చంద్రబాబు స్పష్టం చేశారు.