ప్రేమ, మోసం, హత్య – ఉత్కంఠ రేపుతున్న తేజేశ్వర్ కేసులో షాకింగ్ ట్విస్టులు
గద్వేల్కు చెందిన సర్వేయర్ తేజేశ్వర్ హత్య కేసు తెలుగు రాష్ట్రాల్లో తీవ్ర సంచలనం సృష్టించింది. ఈ కేసులో వెలుగులోకి వస్తున్న ఒక్కో కోణం ప్రజలను ఆశ్చర్యానికి గురిచేస్తోంది. ప్రధానంగా తేజేశ్వర్ భార్య ఐశ్వర్య, బ్యాంక్ మేనేజర్ తిరుమలరావుల అరెస్టుతో ఈ కేసులో అనేక ఊహించని విషయాలు బయటపడ్డాయి. ఈ నెల 17న తేజేశ్వర్ను దారుణంగా హత్య చేసినట్లు పోలీసులు వెల్లడించారు. పెళ్లైన నెల రోజులకే ఐశ్వర్య ఏకంగా ఐదు సార్లు తేజేశ్వర్ను హత్య చేసేందుకు ప్రయత్నించి, ఆరోసారి తన పథకాన్ని అమలు చేసిందని పోలీసులు తెలిపారు. ఈ కేసులో ప్రధాన నిందితుడు బ్యాంక్ మేనేజర్ తిరుమలరావును పోలీసులు బుధవారం శంషాబాద్ ఎయిర్పోర్ట్ సమీపంలో అదుపులోకి తీసుకోవడంతో మరింత లోతైన దర్యాప్తుకు మార్గం సుగమమైంది.
అక్రమ సంబంధం, సుపారీ హత్య పథకం
వివాహేతర సంబంధమే ఈ హత్యకు దారి తీసిందని పోలీసుల దర్యాప్తులో తేలింది. కర్నూలు జిల్లాకు చెందిన తేజేశ్వర్ను ఐశ్వర్య నెల రోజుల క్రితం ప్రేమ వివాహం చేసుకుంది. అయితే, అంతకు ముందు నుంచే ఐశ్వర్యకు, కర్నూలులోని ఒక బ్యాంక్లో మేనేజర్గా పనిచేస్తున్న తిరుమలరావుకు మధ్య అక్రమ సంబంధం ఉందని తెలిసింది. తిరుమలరావు పనిచేసే బ్యాంక్లో ఐశ్వర్య తల్లి పని చేస్తుండగా, ఆ క్రమంలోనే తిరుమలరావుకు, ఐశ్వర్య తల్లికి మధ్య శారీరక సంబంధం ఏర్పడింది. ఆ తర్వాత ఐశ్వర్యతో కూడా తిరుమలరావుకు పరిచయం ఏర్పడి, అది ప్రేమగా మారింది. తిరుమలరావుకు అప్పటికే వివాహం అయ్యి పిల్లలు లేకపోవడంతో ఐశ్వర్యను రెండో వివాహం చేసుకోవాలని భావించాడు. ఈ ప్లాన్కు ఐశ్వర్య కూడా అంగీకరించింది. ఇలా ఏకకాలంలో తల్లీ కూతుళ్లతో తిరుమలరావు సంబంధాన్ని కొనసాగించాడు. గద్వేల్ సర్వేయర్ తేజేశ్వర్ను ఐశ్వర్య పెళ్లి చేసుకున్నప్పటికీ, పెళ్లైన కొద్ది రోజులకే మళ్లీ తిరుమలరావుతో టచ్లోకి వెళ్లింది. తేజేశ్వర్ను ఎలాగైనా వదిలించుకుని తిరుమలరావుతో వెళ్తానని చెప్పింది. దీంతో తిరుమలరావు, ఐశ్వర్య కలిసి తేజేశ్వర్ హత్యకు పథకం పన్నారు. తేజేశ్వర్ను హత్య చేసేందుకు తిరుమలరావు కొంతమందికి రూ. 75 వేల సుపారీ ఇచ్చాడు. ప్రధాన నిందితుడైన మనోజ్ అనే వ్యక్తి ఈ సుపారీని అందుకున్నాడు.
దారుణ హత్య, మృతదేహం మాయం
తేజేశ్వర్ సర్వేయర్ కావడంతో, సర్వే పేరుతో అతడిని బయటకు తీసుకెళ్లి ఈ దారుణానికి ఒడిగట్టారు. ఈ నెల 17న తేజేశ్వర్ను ల్యాండ్ సర్వే పేరుతో నగేష్, పరశురాం, రాజు అనే ముగ్గురు వ్యక్తులు ఇంట్లోంచి బయటకు పిలిచారు. కారులో ఎక్కించుకుని తీసుకెళ్లి, కారు ముందు సీట్లో కూర్చున్న తేజేశ్వర్ మెడ పట్టుకుని రాజు, పరశురాం కత్తితో పొడిచారు. ఆ తర్వాత డ్రైవర్ సీట్లో ఉన్న నగేష్ తేజేశ్వర్ కడుపులో కత్తితో పొడిచి చంపినట్లు పోలీసులు తెలిపారు. హత్య చేసిన తర్వాత కర్నూలు శివారులో మృతదేహాన్ని పడేశారు. డెడ్బాడీని చూసిన తర్వాత సుపారీ బ్యాచ్కు తిరుమలరావు రూ. 2 లక్షలు చెల్లించాడు. హత్యకు ముందు తిరుమలరావు బ్యాంక్ నుంచి రూ. 20 లక్షల లోన్ తీసుకున్నాడు. ఈ హత్య తర్వాత ఐశ్వర్యతో కలిసి లడఖ్ వెళ్లాలని తిరుమలరావు ప్లాన్ చేసుకున్నాడు.
పోలీసుల దర్యాప్తు, అనుమానాస్పద మరణాలు
తేజేశ్వర్ కనిపించడం లేదంటూ అతని తమ్ముడు పోలీసులకు ఫిర్యాదు చేయడంతో పోలీసులు మిస్సింగ్ కేసు నమోదు చేసుకున్నారు. తేజేశ్వర్ ఫోన్ లోకేషన్ ఆధారంగా గద్వేల్ పోలీసులు కర్నూలుకు వెళ్లి ఒక చెరువు వద్ద తేజేశ్వర్ మృతదేహాన్ని కనిపెట్టారు. మృతదేహంపై “అమ్మ” అనే పచ్చబొట్టు ఆధారంగా అది తేజేశ్వర్ మృతదేహంగా నిర్ధారించారు. తిరుమలరావు ఐశ్వర్యతో పరిచయం తర్వాత తన భార్యను చంపేందుకు కూడా ప్లాన్ చేసినట్లు పోలీసులు చెబుతున్నారు. తిరుమలరావుకు ఇప్పటికే పెళ్లయి 8 ఏళ్లు అవుతోంది. సంతానం లేకపోవడంతో ఐశ్వర్యతో పిల్లల్ని కనాలని భావించాడు. హత్య జరిగిన రోజు ఐశ్వర్య లడఖ్ వెళ్లేందుకు తల్లికి ఫోన్ చేసి కొన్ని దుస్తులు తెప్పించుకుంది. ఈ కేసులో పోలీసులు ఇప్పటివరకు 8 మందిని అదుపులోకి తీసుకున్నారు. తాజాగా తిరుమలరావును శంషాబాద్ ఎయిర్పోర్ట్ (Shamshabad Airport) సమీపంలో అరెస్టు చేశారు. ప్రస్తుతం తిరుమలరావును ప్రశ్నిస్తున్న పోలీసులు, సుపారీ గ్యాంగ్తో మర్డర్ సీన్ను రీకన్స్ట్రక్ట్ చేసే పనిలో ఉన్నారు.
ఐశ్వర్య సోదరుడి మరణంపై అనుమానాలు
ఈ కేసు దర్యాప్తులో ఐశ్వర్య సోదరుడి మరణంపై కూడా కొత్త అనుమానాలు తలెత్తాయి. కొన్ని నెలల క్రితం ఐశ్వర్య సోదరుడు ఇంట్లో జారిపడి మరణించినట్లు తెలుస్తోంది. ఆ సమయంలో ప్రమాదవశాత్తు అతను కిందపడి మరణించాడని ఐశ్వర్య, అతని తల్లి చుట్టుపక్కల వారికి చెప్పారు. అయితే, తిరుమలరావుతో తన తల్లి, సోదరి ఐశ్వర్య సన్నిహితంగా ఉండటం నచ్చని అతను వారిద్దరిని వారించినట్లు తెలుస్తోంది. ఆ కోపంతో వారిద్దరే అతన్ని చంపి, ప్రమాదవశాత్తు మరణించినట్లు చిత్రీకరించారా? అనే కోణంలో కూడా పోలీసులు దర్యాప్తు చేస్తున్నారు. ఈ కేసులోని నిందితురాలు ఐశ్వర్య చదివింది పదో తరగతే అయినా, సామాజిక మాధ్యమాల్లో చురుగ్గా ఉండేదని సమాచారం. ఐశ్వర్య తిరుమలరావుతో పాటు మరికొందరితోనూ సంబంధాలు కొనసాగించినట్లు తెలుస్తోంది. ఈ కేసులో ఇంకా ఎటువంటి సంచలన నిజాలు బయటపడతాయో వేచి చూడాలి.
Read also: Rythu Bharosa: రైతు భరోసా డబ్బుల కోసం కన్నతండ్రిపై దాడి చేసిన కుమారుడు