ఆంధ్రప్రదేశ్ ముఖ్యమంత్రి చంద్రబాబు నాయుడు ఈ రోజు గుంటూరు జిల్లాలోని పొన్నెకల్లును సందర్శించనున్నారు. అంబేడ్కర్ జయంతిని పురస్కరించుకుని అక్కడ ఏర్పాటు చేసిన డా. బి.ఆర్. అంబేడ్కర్ విగ్రహానికి పూలమాల వేసి ఆయనకు నివాళులు అర్పించనున్నారు. ప్రతి సంవత్సరం ఈ సందర్భంగా జరిగే కార్యక్రమాలకు，మరింత ప్రాధాన్యం ఉంది.
హాస్టల్ భవనానికి శంకుస్థాపన
ఈ సందర్భంగా సీఎం చంద్రబాబు, సాంఘిక సంక్షేమ శాఖ ఆధ్వర్యంలో నూతనంగా నిర్మించనున్న హాస్టల్ భవనానికి శంకుస్థాపన చేయనున్నారు. అనంతరం అంబేడ్కర్ విదేశీ విద్యా పథకం లబ్ధిదారులతో వర్చువల్ సమావేశం నిర్వహించబోతున్నారు. ఈ పథకం ద్వారా విద్యార్థులు విదేశాల్లో ఉన్నత విద్యను అభ్యసించడానికి ప్రభుత్వ సహాయాన్ని పొందుతున్నారు. విద్యా రంగానికి ప్రభుత్వం ఇచ్చే ప్రాధాన్యతను ఈ కార్యక్రమం బలంగా చాటుతోంది.
‘P-4’ సభ్యులతో సమావేశం
తర్వాత సీఎం చంద్రబాబు ‘P-4’ కార్యక్రమంలో పాల్గొననున్నారు. ఇందులో మార్గదర్శి-బంగారు కుటుంబ సభ్యులతో సమావేశమై అభివృద్ధి, సంక్షేమ కార్యక్రమాలపై వారి అభిప్రాయాలను వింటారు. ప్రజలతో నేరుగా మమేకం కావడం ద్వారా పాలనకు మరింత సమర్థతను తీసుకురావాలనే లక్ష్యంతో చంద్రబాబు ఈ కార్యక్రమాల్లో పాల్గొంటున్నారు. రాష్ట్ర అభివృద్ధి మార్గంలో ప్రజల భాగస్వామ్యం ఎంత ముఖ్యమో ఈ సందర్బంగా ఆయన చర్చించనున్నట్లు సమాచారం.