రాష్ట్ర రాజధాని అమరావతి నిర్మాణానికి సంబంధించి ముఖ్యమైన మలుపు మే 2వ తేదీన రానున్నది. ప్రధానమంత్రి నరేంద్ర మోదీ చేతుల మీదుగా రాజధాని నిర్మాణ పనులు పునఃప్రారంభం కానున్నాయి. ఈ కార్యక్రమాన్ని అత్యంత ఘనంగా నిర్వహించేందుకు రాష్ట్ర ప్రభుత్వం ఏర్పాట్లు ముమ్మరం చేసింది. ఈ సందర్భంగా ముఖ్యమంత్రి నారా చంద్రబాబు నాయుడు ప్రత్యేకంగా రాజధాని పరిధిలోని గ్రామాల రైతులను ఆహ్వానించారు. మే 2వ తేదీ రాష్ట్ర చరిత్రలో నిలిచిపోయే రోజు అవుతుంది. ఇది నూతన ఆంధ్రప్రదేశ్ అభివృద్ధి యాత్రలో ఒక గొప్ప మైలురాయిగా నిలవనుంది, అని సీఎం ప్రకటించారు.
చంద్రబాబు నాయుడు ఈ సందర్భంలో రాజధాని రైతుల త్యాగాన్ని ప్రత్యేకంగా ప్రస్తావించారు. రైతుల యొక్క అసాధారణమైన సహకారమే నేడు ప్రపంచ స్థాయి రాజధాని నిర్మాణానికి బలం ఇచ్చింది, అని ఆయన కొనియాడారు. రాజధాని గ్రామాల రైతులు తమ భూములను ల్యాండ్ పూలింగ్ ద్వారా అందించడమే కాక, తమ భవిష్యత్తును అమరావతి భవిష్యత్తుతో అనుసంధానించారు. ఈ గొప్ప త్యాగాన్ని ఆంధ్రప్రదేశ్ ప్రజలు ఎప్పటికీ మరచిపోలేరు, అని సీఎం పేర్కొన్నారు. రాష్ట్ర అభివృద్ధిలో రైతుల పాత్ర అత్యంత కీలకం. రాజధాని నిర్మాణంలో జరుగుతున్న ప్రతి పనిలో మీరు భాగస్వాములై ఉండాలి, అని రైతులను పిలుపునిచ్చారు.
రైతులకు ప్రత్యేక హామీలు
సోమవారం రోజు ఉండవల్లిలోని తన నివాసంలో సీఎం చంద్రబాబు రాజధాని పరిధిలోని వివిధ గ్రామాల రైతులతో సమావేశమయ్యారు. ఈ సమావేశంలో పలు అంశాలపై రైతులతో విస్తృతంగా చర్చించారు. ముఖ్యంగా ల్యాండ్ పూలింగ్ ద్వారా భూములు ఇచ్చిన రైతులకు కేటాయించే ప్లాట్లపై చర్చ సాగింది. ల్యాండ్ పూలింగ్లో రాజధాని నిర్మాణానికి భూములు ఇచ్చిన రైతులకు ప్రభుత్వం తిరిగి కేటాయించే ప్లాట్లకు బ్యాంకుల నుంచి రుణాలు పొందేందుకు చర్యలు తీసుకుంటామని ఈ సందర్భంగా సీఎం చంద్రబాబు హామీ ఇచ్చారు.
Read also: TDP : ఇతిహాసాలపై అభ్యంతరకర వ్యాఖ్యలు.. టీడీపీ ప్రతినిధిపై వేటు