ఆక్వా రైతుల సమస్యలపై ముఖ్యమంత్రి చంద్రబాబు జరిపే సమావేశాలు వాస్తవంగా ప్రయోజనకరంగా ఉండాలని వైఎస్సార్ కాంగ్రెస్ పార్టీ అధినేత వైఎస్ జగన్ వ్యాఖ్యానించారు. రొయ్యల ధర విషయంలో స్పష్టత అవసరమని, రైతులకు లాభం కలిగే విధంగా ప్రభుత్వం నడవాలని ఆయన ట్వీట్ ద్వారా కోరారు. ముఖ్యంగా రొయ్యల మార్కెట్ ధరలు పెరగకపోవడంపై చంద్రబాబును ప్రశ్నించారు.
ఫీడ్ ధరలు తగ్గలేదని ఆరోపణ
జగన్ చేసిన ట్వీట్లో, “రొయ్యలకు అవసరమైన మేతపై సుంకం 15 శాతం నుంచి 5 శాతానికి తగ్గించాం. సోయాబీన్ ధర కిలోకు రూ.105 నుంచి రూ.25కి పడిపోయింది. అయినప్పటికీ ఫీడ్ ధరలు తగ్గకపోవడం ఏంటని?” అని జగన్ ప్రశ్నించారు. ముడి సరుకుల ధరలు గణనీయంగా తగ్గినా, వాటి ప్రభావం రైతులకు అందే ఖర్చులపై ఎందుకు పడడం లేదని ప్రశ్నించారు. ఇది ఆక్వా రైతులకు తీవ్రంగా భారంగా మారిందని ఆయన అభిప్రాయపడ్డారు.
ఎగుమతులపై అమెరికా టారిఫ్ వాయిదా – ధర ఎందుకు స్థిరంగా ఉంది?
అమెరికాలో భారత రొయ్యలపై విధించే టారిఫ్లు వాయిదా పడినా కూడా ఎగుమతుల రేట్లు పెరగకపోవడాన్ని జగన్ విమర్శించారు. ఈ పరిస్థితుల్లో ఆక్వా రంగం ప్రమాదకరంగా మలుపు తిరుగుతోందని పేర్కొంటూ, రైతుల కోసం నిఖార్సైన చర్యలు తీసుకోవాలని సూచించారు. రైతులకు లాభం చేకూరే విధంగా పాలసీలు ఉండాలన్నది జగన్ యొక్క ప్రధాన సందేశంగా నిలిచింది.