Chandrababu : నేడు పోలవరంలో చంద్రబాబు పర్యటన పోలవరం ప్రాజెక్టు ఆంధ్రప్రదేశ్ రాష్ట్రానికి జీవనాడి. ఈ భారీ ప్రాజెక్టు పూర్తి కాకుండా ఉండటంతో నిర్వాసితుల సమస్యలు పెరిగిపోతున్నాయి. ప్రాజెక్టును వేగంగా పూర్తి చేసి, నిర్వాసితులకు న్యాయం చేయాల్సిన బాధ్యత ప్రభుత్వానిదేనని ముఖ్యమంత్రి చంద్రబాబు నాయుడు స్పష్టం చేశారు. 2026 డిసెంబర్ నాటికి పూర్తిస్థాయి పునరావాస కార్యక్రమాలను పూర్తిచేయాలని అధికారులను ఆదేశించారు. అవసరమైన అన్ని రకాల సౌకర్యాలను అందించేందుకు ప్రభుత్వం పూర్తిగా కట్టుబడి ఉందని స్పష్టం చేశారు. 2014లో తాము అధికారంలోకి రాకముందు నిర్వాసితులకు చాలా తక్కువ పరిహారం అందించారని సీఎం చంద్రబాబు విమర్శించారు. ఎన్డీఏ ప్రభుత్వం ఏర్పడిన తర్వాత రూ.4,311 కోట్ల పరిహారం అందించామని తెలిపారు. అయితే, 2019లో వచ్చిన వైసీపీ ప్రభుత్వం ఐదేళ్ల పాటు నిర్వాసితులను పూర్తిగా నిర్లక్ష్యం చేసిందని ఆరోపించారు. ప్రజల కష్టాలను పట్టించుకోకుండా, వారి సమస్యలను పరిష్కరించేందుకు ఎలాంటి చొరవ తీసుకోలేదని ఆయన మండిపడ్డారు.
పోలవరం పూర్తవ్వాలంటే ముంపు మండలాల విలీనం తప్పనిసరి
పోలవరం ప్రాజెక్టు పూర్తవ్వాలంటే తెలంగాణలోని 7 ముంపు మండలాలను ఏపీలో విలీనం చేయడం అవసరమని, అప్పట్లో ప్రధాని నరేంద్ర మోదీని ఒప్పించామని చంద్రబాబు గుర్తుచేశారు. వీలైనంత వరకు నిర్వాసితులకు న్యాయం చేయడం కోసం తన హయాంలో మద్దతుగా ముందుకెళ్లామని చెప్పారు.
రూ.400 కోట్లతో నిర్మించిన డయాఫ్రం వాల్ వైసీపీ ప్రభుత్వ నిర్లక్ష్యం వల్ల కొట్టుకుపోయిందని ఆరోపించారు. ఇప్పుడు దాన్ని మళ్లీ రూ.990 కోట్లతో కొత్తగా నిర్మిస్తున్నామని తెలిపారు. ప్రజల సొమ్మును నిర్వాకంగా ఖర్చు పెట్టడం అన్యాయమని, ప్రాజెక్టు కోసం కచ్చితమైన ప్రణాళికతో ముందుకెళ్లాలని సూచించారు.
పోలవరం నిధులను మళ్లించిన గత పాలకులు
తన హయాంలో సోమవారం రోజును ప్రత్యేకంగా ‘పోలవరం డే’గా మార్చుకుని ఈ ప్రాజెక్టుపై ప్రత్యేక దృష్టి పెట్టామని చంద్రబాబు వివరించారు. తాను 33 సార్లు ప్రాజెక్టును సందర్శించానని తెలిపారు. కేంద్ర ప్రభుత్వం కేటాయించిన నిధులను గత పాలకులు ఇతర అవసరాలకు మళ్లించారని మండిపడ్డారు.
పోలవరం హైడ్రోఎలక్ట్రిక్ ప్రాజెక్టు పూర్తి అయ్యి ఉంటే రాష్ట్రానికి ప్రతి ఏడాది రూ.2,500 కోట్ల ఆదాయం వచ్చేదని అన్నారు. ప్రాజెక్టు ఆలస్యం కావడంతో అదనపు భారం పడిందని, పనులు ఇంకా పెండింగ్ లోనే ఉన్నాయన్నారు.
దళారులు, మోసగాళ్లకు ఈ ప్రభుత్వంలో చోటు లేదు
పునరావాస కేంద్రాల్లో ఏర్పాట్లు పూర్తయిన తర్వాత, నిర్వాసితుల జీవన ప్రమాణాలు మెరుగుపడేలా ప్రభుత్వం అన్ని చర్యలు తీసుకుంటుందని సీఎం చంద్రబాబు హామీ ఇచ్చారు.”ఈ ప్రభుత్వం నిర్వాసితులకు అండగా నిలుస్తుంది. మోసగాళ్లు, దళారులకు చోటు లేదు. ప్రజల నిధులు ప్రజల కోసమే ఖర్చు చేయాలి. గిరిజనులు అత్యధికంగా త్యాగం చేశారు. అందుకే, ఇళ్లు నిర్మించుకునే గిరిజన కుటుంబాలకు రూ.75,000 అదనంగా అందజేస్తాం” అని సీఎం చంద్రబాబు నాయుడు ప్రకటించారు.
సమగ్ర అభివృద్ధికి ప్రణాళికలు సిద్ధం
పోలవరం నిర్మాణాన్ని వేగవంతం చేయడానికి అవసరమైన ప్రతి చర్య తీసుకుంటున్నామని, కేంద్రం సహకారంతో ప్రాజెక్టును త్వరగా పూర్తి చేయాలని లక్ష్యంగా పెట్టుకున్నామని చంద్రబాబు చెప్పారు. రాష్ట్రాభివృద్ధిలో పోలవరం కీలకమైన ప్రాజెక్టు అని, దీని ద్వారా లక్షలాది మందికి ఉపాధి అవకాశాలు లభిస్తాయని తెలియజేశారు. పోలవరం ప్రాజెక్టు పూర్తి చేయడం కోసం రాష్ట్ర ప్రభుత్వం మరింత కృషి చేయాలని ప్రజలు కోరుతున్నారు. ఈ ప్రాజెక్టు పూర్తయితే రాష్ట్ర భవిష్యత్తు उज్వలంగా మారుతుందని భావిస్తున్నారు. సీఎం చంద్రబాబు తీసుకుంటున్న చర్యలు ప్రాజెక్టు పనులను వేగవంతం చేసి, నిర్వాసితులకు ఊరట కలిగిస్తాయని ప్రజలు ఆశిస్తున్నారు.