భారత క్రికెట్ దిగ్గజం కపిల్ దేవ్ నేడు ఆంధ్రప్రదేశ్ ముఖ్యమంత్రి చంద్రబాబు నాయుడును ఉండవల్లిలో కలిశారు. ఈ సందర్భంగా సీఎం చంద్రబాబు కపిల్ దేవ్కు హార్దిక స్వాగతం పలికారు. కపిల్ దేవ్తో తన భేటీకి సంబంధించిన వివరాలను చంద్రబాబు సోషల్ మీడియా వేదికగా పంచుకున్నారు.
చంద్రబాబు మాట్లాడుతూ, “మన క్రికెట్ దిగ్గజం మరియు ప్రొఫెషనల్ గోల్ఫ్ టూర్ ఆఫ్ ఇండియా చైర్మన్ కపిల్ దేవ్ మరియు ఆయన బృందంతో కలవడం నాకు ఎంతో ఆనందం ఇచ్చింది. ఈ సమావేశంలో ఆంధ్రప్రదేశ్లో క్రీడా రంగ విస్తరణపై కీలక చర్చలు జరిపాము. ముఖ్యంగా అమరావతిలో అంతర్జాతీయ స్థాయి గోల్ఫ్ కోర్స్ మరియు గోల్ఫ్ క్లబ్ స్థాపన గురించి, అలాగే అనంతపూర్ మరియు విశాఖపట్నం ప్రాంతాలలో ప్రీమియర్ గోల్ఫ్ కోర్సులు ఏర్పాటు చేయాలన్న ప్రతిపాదనలపై చర్చించాం. ఈ ప్రయత్నాలు యువతలో గోల్ఫ్ పట్ల ఆసక్తి పెంచేందుకు, తదుపరి తరం గోల్ఫ్ క్రీడాకారులను తయారుచేయడంలో ఎంతగానో ఉపయోగపడతాయని ఆశిస్తున్నాము” అని తెలిపారు.
అంతేకాకుండా, “రాష్ట్రవ్యాప్తంగా పౌరులకు మెరుగైన క్రీడా అవకాశాలు, సదుపాయాలు కల్పించేందుకు ప్రభుత్వం నిరంతరం కృషి చేస్తోంది. ఏపీని క్రీడా రంగంలో ప్రధాన కేంద్రంగా తీర్చిదిద్దేందుకు, కపిల్ దేవ్ వంటి క్రీడా రంగ మహానుభావులతో కలిసి పని చేసేందుకు మా ప్రభుత్వం ఎల్లప్పుడూ సన్నద్ధంగా ఉంటుంది” అని చంద్రబాబు వెల్లడించారు ఈ భేటీ ద్వారా క్రీడల ప్రోత్సాహం, గోల్ఫ్ వంటి ఆటలను రాష్ట్రంలో అభివృద్ధి చేయడం లక్ష్యంగా పెట్టుకున్నామని, క్రీడా రంగంలో ఏపీకి ఉన్న విస్తార అవకాశాలను ఉపయోగించుకుని, దేశంలోనే అగ్రగామిగా నిలిచే క్రీడా హబ్గా రాష్ట్రాన్ని మార్చే దిశగా పణిగొడుతున్నామని ఆయన పేర్కొన్నారు.
