AP High Court: భార్యాభర్తల మధ్య తలెత్తే వ్యక్తిగత మరియు చట్టపరమైన విభేదాల్లోకి పిల్లలను లాగడం ఏమాత్రం ఆమోదయోగ్యం కాదని ఆంధ్రప్రదేశ్ హైకోర్టు కీలక వ్యాఖ్యలు చేసింది. తన ఇద్దరు పిల్లలకు డీఎన్ఏ (DNA) పరీక్షలు నిర్వహించాలని కోరుతూ ఒక భర్త దాఖలు చేసిన పిటిషన్ను న్యాయస్థానం నిర్ద్వంద్వంగా తోసిపుచ్చింది. తల్లిదండ్రుల మధ్య సాగే న్యాయపోరాటంలో పిల్లల ఆత్మగౌరవాన్ని, వారి హక్కులను కాపాడటం అత్యంత ప్రధానమని కోర్టు స్పష్టం చేసింది.
Read Also:AP Govt Jobs 2026: నిరుద్యోగులకు ఉగాది కానుక.. 10,060 ప్రభుత్వ ఉద్యోగాల భర్తీ
విడాకుల కేసు విచారణలో భాగంగా, తన భార్యకు మరొక వ్యక్తితో సంబంధం ఉందని నిరూపించడానికి పిల్లల డీఎన్ఏ పరీక్షలు అవసరమని సదరు వ్యక్తి కోర్టును ఆశ్రయించారు. ఆ పిల్లలకు తాను తండ్రిని కాదనే నిజాన్ని ఈ పరీక్షలు వెల్లడిస్తాయని, తద్వారా భార్య ప్రవర్తనపై తాను చేసిన ఆరోపణలకు బలమైన సాక్ష్యం లభిస్తుందని ఆయన వాదించారు. అయితే, గతంలో ట్రయల్ కోర్టు కూడా ఇదే విన్నపాన్ని తిరస్కరించిన విషయాన్ని హైకోర్టు ఈ సందర్భంగా గుర్తు చేసింది.
భార్యాభర్తల పోరాటంలో పిల్లలను బలి చేయొద్దు!
ఈ కేసును విచారించిన జస్టిస్ తార్లాడ రాజశేఖరరావు ధర్మాసనం, వివాహేతర సంబంధాల ఆరోపణలను నిరూపించుకోవడానికి పిల్లలను ఒక సాధనంగా వాడుకోవడం చట్టబద్ధంగా సరికాదని తేల్చి చెప్పారు. భార్యపై ఉన్న ఆరోపణలను ఇతర సాక్ష్యాధారాల ద్వారా నిరూపించుకోవాలే తప్ప, అందుకోసం పిల్లల భవిష్యత్తును పణంగా పెట్టకూడదని ఆదేశించారు. భారత సాక్ష్యాధారాల చట్టంలోని సెక్షన్ 112 ప్రకారం, చెల్లుబాటు అయ్యే వివాహ బంధంలో జన్మించిన బిడ్డను చట్టబద్ధమైన సంతానంగానే పరిగణించాలని న్యాయమూర్తి పేర్కొన్నారు.
డీఎన్ఏ పరీక్షలు నిర్వహించడం వల్ల పిల్లల మానసిక స్థితి దెబ్బతినడమే కాకుండా, సమాజంలో వారి ప్రతిష్టకు భంగం కలుగుతుందని కోర్టు ఆందోళన వ్యక్తం చేసింది. 2024లో సుప్రీంకోర్టు ఇచ్చిన తీర్పును ఉదహరిస్తూ.. పిల్లల గోప్యతను, వ్యక్తిగత స్వేచ్ఛను గౌరవించాల్సిన బాధ్యత అందరిపై ఉందని హైకోర్టు గుర్తు చేసింది. కేవలం అనుమానాల ఆధారంగా పిల్లల జీవితాలతో ఆడుకోలేమని స్పష్టం చేస్తూ భర్త దాఖలు చేసిన పిటిషన్ను కొట్టివేసింది.
Read hindi news: hindi.vaartha.com
Epaper: epaper.vaartha.com
Read Also:
