గుంటూరు జిల్లా తెనాలిలో దివంగత నటుడు, సూపర్ స్టార్ కృష్ణ కాంస్య విగ్రహం ఆవిష్కరించబడింది. ఈ కార్యక్రమంలో మంత్రి నాదెండ్ల మనోహర్, నిర్మాత ఆదిశేషగిరిరావు పాల్గొని విగ్రహాన్ని ఆవిష్కరించారు. అభిమానులు, సినీ ప్రేమికులు పెద్ద సంఖ్యలో ఈ కార్యక్రమానికి హాజరయ్యారు. సూపర్ స్టార్ కృష్ణ భారత సినీ పరిశ్రమలో తనదైన ముద్ర వేశారు. ఆయన నటనతోనే కాకుండా, టెక్నాలజీని పరిచయం చేసి సినిమా రంగానికి నూతన ఒరవడి చూపించారు. కృష్ణ తీసిన సినిమాలు పాత తరానికి గర్వకారణంగా నిలిచాయి.
కార్యక్రమంలో మంత్రి నాదెండ్ల మనోహర్ మాట్లాడుతూ, కృష్ణ గారి జీవితమంతా విలువలతో జీవించారని, సినీ పరిశ్రమకు ఎంతో కృషి చేశారని కొనియాడారు. “ఆయనను స్మరించుకుంటూ ఈ విగ్రహాన్ని ఏర్పాటు చేయడం గర్వంగా ఉంది” అని ఆయన అన్నారు. నిర్మాత ఆదిశేషగిరిరావు మాట్లాడుతూ.. కృష్ణ గారి సినిమాలు ప్రేక్షకుల హృదయాల్లో చిరస్థాయిగా నిలిచిపోతాయన్నారు. “ఆయన విజన్‌ను సినీ పరిశ్రమ ఇప్పటికీ ఫాలో అవుతోంది. కృష్ణగారితో పనిచేయడం మా అదృష్టం” అని అన్నారు. తెనాలిలో ఈ విగ్రహం ఆవిష్కరణతో సూపర్ స్టార్ కృష్ణ అభిమానులకు మరింత స్ఫూర్తి ఇచ్చింది. ఈ విగ్రహం ఆయన కీర్తిని గుండెల్లో నిలుపుకునే సూచికగా మారిందని అభిమానులు ఆనందం వ్యక్తం చేశారు.