సంధ్య థియేటర్ ఘటనపై సినీ హీరో అల్లు అర్జున్ ఇటీవల ప్రెస్ మీట్ నిర్వహించి తన వైఖరిని స్పష్టంచేశారు. అనుమతులు ఉన్నందునే తాను థియేటర్ వద్దకు వెళ్లానని, అక్కడ జరిగిన తొక్కిసలాట ఘటనకు సంబంధించి తనకు పోలీసులెవరూ మాట్లాడలేదని అల్లు అర్జున్ వివరణ ఇచ్చారు. ఈ ఘటన కు ఎవ్వరు బాద్యులు కారని , అనుకోకుండా జరిగిన ఓ ఆక్సిడెంట్ అని , రేవతి కుటుంబాన్ని తప్పకుండా ఆదుకుంటామని స్పష్టం చేసారు.
అల్లు అర్జున్ వ్యాఖ్యలపై తెలంగాణ మంత్రి శ్రీధర్ బాబు స్పందించారు. సంధ్య థియేటర్ వద్ద అల్లు అర్జున్ అభిమానులకు అభివాదం చేయడం, రోడ్ షోలో పాల్గొనడం వంటి అంశాల్లో వాస్తవాలు ఏమిటనేది అల్లు అర్జున్‌కు కూడా తెలుసని మంత్రి వ్యాఖ్యానించారు. ఈ ఘటనకు సంబంధించిన వీడియోలు పరిశీలిస్తే నిజాలు బయటపడతాయని స్పష్టం చేశారు. సినీ ప్రముఖులు బాధితుల పరిస్థితులను కూడా గుర్తించాలని, వారి కుటుంబాలను పరామర్శించడం అవసరమని మంత్రి తెలిపారు. సీఎం రేవంత్ రెడ్డి ఉద్దేశం కేవలం బాధితులకు న్యాయం చేయడం మాత్రమేనని, ఆ అంశం పట్ల ఎవ్వరూ విభేదించరాదని ఆయన అన్నారు.