తెలంగాణలో నిరుద్యోగ యువతకు నైపుణ్య శిక్షణ అందించేందుకు స్థాపించిన యంగ్ ఇండియా స్కిల్ యూనివర్శిటీ మరో కీలక ప్రకటన చేసింది. ఇప్పటికే నాలుగు ప్రాధాన్య కోర్సులను నిర్వహిస్తున్న యూనివర్శిటీ, మార్కెట్ డిమాండ్‌ను దృష్టిలో ఉంచుకుని కొత్త కోర్సులను ప్రారంభించబోతోంది. ఈ ప్రకటనతో యువతలో కొత్త ఆశలు మిగిలాయి.
ఖాజాగూడలోని ఇంజినీరింగ్ స్టాఫ్ కాలేజీ ఆఫ్ ఇండియా ప్రాంగణంలో తాత్కాలికంగా కొనసాగుతున్న ఈ యూనివర్శిటీ, లాజిస్టిక్స్, ఈ-కామర్స్ రంగాల్లో ఇప్పటికే శిక్షణను అందిస్తోంది. తాజాగా సప్లై చైన్ ఎసెన్షియల్స్ ప్రొఫెషనల్ సర్టిఫికేషన్, ఎగ్జిక్యూటివ్ కోర్సులను ప్రవేశపెట్టింది. ఈ కోర్సులకు నవతా లాజిస్టిక్స్ శిక్షణను అందిస్తోంది. ఇక బ్యాంకింగ్, ఫైనాన్షియల్ సర్వీసెస్, ఇన్సూరెన్స్ రంగాలకు అవసరమైన ప్రత్యేక కోర్సును కూడా ప్రారంభించనున్నారు. అంతేకాక, డాక్టర్ రెడ్డీస్ ఫార్మా టెక్నీషియన్ ప్రోగ్రామ్, లెన్స్‌కార్ట్ స్టోర్ అసోసియేషన్ కోర్సులను కూడా అందుబాటులోకి తీసుకురావడానికి యూనివర్శిటీ సిద్ధమైంది.
ఈ కోర్సుల ద్వారా నిరుద్యోగ యువతకు మార్కెట్ అవసరాలకు అనుగుణంగా నైపుణ్యాలను పెంపొందించే అవకాశాన్ని కల్పించనున్నారు. ఆసక్తిగల అభ్యర్థులు యంగ్ ఇండియా స్కిల్ యూనివర్శిటీ అధికారిక వెబ్‌సైట్‌ ద్వారా ఆన్‌లైన్‌లో దరఖాస్తు చేసుకోవాలని యూనివర్శిటీ ప్రతినిధులు సూచించారు. నూతన కోర్సుల ప్రవేశంతో ఈ యూనివర్శిటీ, విద్యార్థుల తీరుని మార్చడంలో కీలక పాత్ర పోషించనుంది. యువతకు కొత్త అవకాశాలు తెరిచే ఈ కోర్సులు, వారి భవిష్యత్తు నిర్మాణానికి దోహదపడతాయని నిపుణులు అభిప్రాయపడుతున్నారు.