మనిషి మెదడులోకి ప్లాస్టిక్ రేణువులు

మనిషి మెదడులోకి ప్లాస్టిక్ రేణువులు

అసలు ఏంటి ఈ విషయం? ప్లాస్టిక్ కాలుష్యం అనేది మనం ఎదుర్కొంటున్న అతి పెద్ద సమస్యల్లో ఒకటి. మన రోజువారీ జీవితంలో ప్లాస్టిక్ అంతగా జొరబడింది, దాన్ని లేకుండా ఉండటం అసాధ్యం అనే స్థితికి చేరుకుంది. ఉదయం లేచిన దగ్గర నుంచి రాత్రి పడుకునే వరకు ప్లాస్టిక్ వినియోగంలో ఉంటూనే ఉంటాం. మార్కెట్‌కి వెళ్లి కూరగాయలు తెచ్చుకోవటం, టిఫిన్లు తీసుకోవటం ఇలా ప్లాస్టిక్ లేకుండా మన జీవితం సాగడం కష్టంగా మారింది. అయితే, మనిషి మెదడులోకి ప్లాస్టిక్ రేణువులు చేరుతున్నాయని పరిశోధనలు హెచ్చరిస్తున్నాయి.

న్యూ మెక్సికో పరిశోధనలో ఆందోళనకరమైన నిజాలు

న్యూ మెక్సికో యూనివర్సిటీ చేసిన అధ్యయనంలో మైక్రో ప్లాస్టిక్ రేణువులు మన శరీరంలోకి ప్రవేశించి చివరకు మెదడులో స్థిరపడుతున్నాయని తేలింది. మన మెదడును రక్షించే బ్లడ్-బ్రెయిన్ బ్యారియర్ అనే రక్షణ వ్యవస్థను కూడా మైక్రో ప్లాస్టిక్ దాటిపోతున్నాయని శాస్త్రవేత్తలు గుర్తించారు. 2016లో మరణించిన వారి మెదడు టిష్యూలను 2024లో మరణించిన వారి మెదడు టిష్యూలతో పోల్చి చూడగా, 2024 నాటికి మెదడులో సూక్ష్మ ప్లాస్టిక్ రేణువుల స్థాయి 50% పెరిగినట్లు కనిపించింది. కేవలం 8 ఏళ్లలోనే ఇంత పెరుగుదల ఆందోళన కలిగించే అంశం.

మైక్రో ప్లాస్టిక్ వల్ల కలిగే ముప్పులు

మైక్రో ప్లాస్టిక్ రేణువులు రక్తనాళాల్లో పేరుకుపోయి రక్త ప్రసరణకు ఆటంకం కలిగించే ప్రమాదం ఉంది. ఇది మెదడుకు అవసరమైన ఆక్సిజన్, పోషకాలు అందకుండా చేసి మెదడు పనితీరును దెబ్బతీసే అవకాశం ఉంది. నాడీకణాల మధ్య సమాచార మార్పిడి ప్రభావితం అవ్వడం వల్ల జ్ఞాపకశక్తి, ఆలోచనా సామర్థ్యం తగ్గే ప్రమాదం ఉంది. దీని కారణంగా అల్జీమర్స్, పార్కిన్సన్స్ వంటి వ్యాధులు వచ్చే అవకాశం ఉందని పరిశోధనలు సూచిస్తున్నాయి.

గర్భిణీలపై ప్రభావం

గర్భిణీలు ప్లాస్టిక్ వినియోగాన్ని తగ్గించుకోవడం ఎంతో అవసరం. ఎందుకంటే, మైక్రో ప్లాస్టిక్ రేణువులు తల్లి నుండి బిడ్డకు చేరే ప్రమాదం ఉంది. ఇది పుట్టబోయే బిడ్డ మెదడు ఎదుగుదలపై తీవ్ర ప్రభావం చూపించవచ్చు.

పరిష్కార మార్గాలు

ప్లాస్టిక్ వినియోగాన్ని తగ్గించాల్సిన అవసరం ఇప్పుడు మరింత పెరిగింది. పర్యావరణహిత పదార్థాలైన జనపనార, వెదురు, గాజు వంటి వాటితో తయారైన ఉత్పత్తులను ప్రోత్సహించాలి. ప్లాస్టిక్ బదులుగా పర్యావరణ హితమైన జీవనశైలిని అలవర్చుకోవాలి.

తక్షణ చర్య అవసరం

మైక్రో ప్లాస్టిక్ రేణువులు మెదడులోకి చేరి అనారోగ్య సమస్యలకు కారణమవుతున్నాయి. ఇప్పటికైనా మేల్కొని ప్లాస్టిక్ వినియోగాన్ని తగ్గించుకోవాలి. లేకుంటే భవిష్యత్ తరాలు తీవ్రమైన ఆరోగ్య సమస్యలను ఎదుర్కోవాల్సి వస్తుంది. ప్లాస్టిక్ కాలుష్యం మనుగడకే ప్రమాదంగా మారకముందే దీనికి పరిష్కారం కనిపెట్టాల్సిన అవసరం ఉంది.