గత బీఆర్‌ఎస్ ప్రభుత్వం ప్రతిష్టాత్మకంగా చేపట్టిన ‘ఫార్మా సిటీ’ ప్రాజెక్టు కోసం తాము సేకరించిన భూములను, ఇప్పుడు కాంగ్రెస్ ప్రభుత్వం పేరు మార్చి ‘ఫ్యూచర్ సిటీ’గా పిలుచుకోవడంపై కేసీఆర్ తీవ్ర అభ్యంతరం వ్యక్తం చేశారు. ఫార్మా రంగంలో తెలంగాణను ప్రపంచ స్థాయికి తీసుకెళ్లాలనే లక్ష్యంతో తాము భూసేకరణ చేస్తే, ప్రస్తుత ప్రభుత్వం ఆ లక్ష్యాన్ని పక్కన పెట్టి రియల్ ఎస్టేట్ వ్యాపారానికి ప్రాధాన్యత ఇస్తోందని ఆయన ఆరోపించారు. “అది ఫ్యూచర్ సిటీనా లేక తోక సిటీనా?” అంటూ వ్యంగ్యాస్త్రాలు సంధిస్తూ, స్పష్టమైన విజన్ లేని ప్రాజెక్టులతో ప్రజలను మభ్యపెడుతున్నారని ఆయన మండిపడ్డారు. అభివృద్ధి అంటే కేవలం పేర్లు మార్చడం కాదని, ఆ ప్రాజెక్టుల ద్వారా వచ్చే ఉపాధి ముఖ్యం అని ఆయన గుర్తు చేశారు.
Roshan: క్రికెటర్ కావాలనుకున్న: హీరో రోషన్
రాష్ట్రంలో విద్యా వ్యవస్థ మరియు విద్యార్థుల సంక్షేమంపై ప్రభుత్వం చూపిస్తున్న నిర్లక్ష్యాన్ని కేసీఆర్ ఎండగట్టారు. గురుకుల పాఠశాలలు మరియు హాస్టళ్లలో విద్యార్థులకు సరైన వసతులు కల్పించడంలో, పౌష్టికాహారం అందించడంలో ప్రభుత్వం విఫలమైందని ఆయన ఆరోపించారు. “కనీసం విద్యార్థులను సాకలేని మీరు, లక్షల కోట్లతో ఫ్యూచర్ సిటీలను ఎలా కడతారు?” అని ఆయన ప్రశ్నించారు. ప్రాథమిక అవసరాలను తీర్చలేని ప్రభుత్వం, ఆకాశహర్మ్యాల గురించి మరియు కొత్త నగరాల గురించి మాట్లాడటం హాస్యాస్పదంగా ఉందని కేసీఆర్ విమర్శించారు. ప్రభుత్వం తన ప్రాధాన్యతలను మర్చిపోయిందని ఆయన ధ్వజమెత్తారు.
ప్రభుత్వ నిర్ణయాల వెనుక రియల్ ఎస్టేట్ బ్రోకర్ల హస్తం ఉందని, కేవలం భూముల ధరలను పెంచి ప్రయోజనం పొందడమే ఈ ‘ఫ్యూచర్ సిటీ’ వెనుక ఉన్న అసలు రహస్యమని కేసీఆర్ సంచలన ఆరోపణలు చేశారు. ఈ సందర్భంగా ‘వనతార’ ప్రాజెక్టును ప్రస్తావిస్తూ, అటవీ ప్రాంతాలను లేదా జూ పార్కులను ప్రైవేట్ వ్యక్తులకు అప్పగించే ప్రయత్నం జరుగుతోందని ఆయన ఆందోళన వ్యక్తం చేశారు. ప్రభుత్వ విధానాలన్నీ ప్రజా ప్రయోజనాల కంటే రియల్ ఎస్టేట్ లావాదేవీల చుట్టూనే తిరుగుతున్నాయని, ఇది రాష్ట్ర ప్రయోజనాలను దెబ్బతీసే “దిక్కుమాలిన పాలసీ” అని ఆయన అభివర్ణించారు. అభివృద్ధి పేరుతో ప్రకృతి సంపదను మరియు ప్రభుత్వ భూములను అమ్ముకోవడమే ప్రస్తుత పాలనగా మారిందని ఆయన తీవ్రంగా విమర్శించారు.
Read hindi news: hindi.vaartha.com
Epaper : epaper.vaartha.com
