మహాకుంభమేళ అనే ఆధ్యాత్మిక ఉత్సవం అందరికీ ప్రత్యేకం. 12 ఏళ్లకోసారి జరిగే ఈ విశిష్ట కుంభమేళా ప్రపంచవ్యాప్తంగా కోట్లాది మంది భక్తులను, పర్యాటకులను ఆకర్షిస్తుంది. ఈసారి జనవరి 13 నుంచి ఫిబ్రవరి 26 వరకు ప్రయాగ్‌ రాజ్‌లో నిర్వహించనున్న ఈ మహా కుంభమేళాలో సుమారు 45 కోట్ల మంది పాల్గొనే అవకాశం ఉందని అంచనా వేస్తున్నారు.ముఖ్యంగా, ఈసారి కుంభమేళాలో అండర్‌ వాటర్‌ డ్రోన్లను ప్రవేశపెట్టనున్నారు.ఈ డ్రోన్లు నీటిలో ఎటువంటి ప్రమాదాలు జరిగితే వెంటనే గుర్తించి స్పందించడానికి అనుకూలంగా ఉంటాయి. ఇప్పటికే ఈ డ్రోన్లను టెస్టింగ్‌ చేసి, విజయవంతమైన ఫలితాలు సాధించారు. ప్రత్యేకంగా భక్తులు గంగా స్నానాల కోసం చేరుతుండటంతో, నీటిలో ఎవరైనా ప్రమాదంలో చిక్కుకుంటే వెంటనే చర్యలు తీసుకోవడానికి వీటిని వినియోగిస్తున్నారు.
మహాకుంభమేళా ప్రాంతమంతటా సీసీ కెమెరాలు ఏర్పాటు చేసి నిఘా కొనసాగిస్తున్నారు. ప్రతి కోణంలో భద్రతా పర్యవేక్షణ ఉండేలా ఏర్పాట్లు చేశారు. నిఘా నేత్రాలతో పాటు అనుభవజ్ఞులైన భద్రతా సిబ్బందిని మోహరించారు. ఈ మహా ఉత్సవం సందర్భంగా ఏ చిన్న అవాంఛనీయ ఘటన జరగకుండా ఉండేందుకు అధికారులు విశేషమైన చర్యలు తీసుకుంటున్నారు.మహాకుంభమేళాకు వచ్చే భక్తులు, సాధువుల కోసం విశాలమైన వసతి సౌకర్యాలను ఏర్పాటు చేశారు. ప్రత్యేక టెంట్ సిటీలను నిర్మించి, లక్షలాది మందికి గృహ అవసరాలను తీర్చేందుకు సిద్ధమయ్యారు.
విశిష్ట భక్తులు, పర్యాటకుల కోసం ప్రత్యేకంగా ఆధునిక హంగులతో కూడిన వసతులు కల్పిస్తున్నారు.ఈసారి మహాకుంభమేళాలో ప్రభుత్వం ఆధ్యాత్మికతకు ఆధునిక సౌకర్యాలను జోడించి, భక్తులకు చిరస్మరణీయమైన అనుభూతిని అందించేందుకు ప్రయత్నిస్తోంది. 45 రోజుల పాటు జరిగే ఈ మహా కుంభమేళా, భారతీయ ఆధ్యాత్మికతను ప్రపంచానికి ప్రదర్శించేందుకు ఉత్కృష్ట వేదికగా నిలుస్తోంది.ప్రతిసారి కుంభమేళా నిర్వహణకు ప్రభుత్వాలు విశేష కృషి చేస్తాయి. కానీ, ఈసారి ఏర్పాట్లలో అధునాతన టెక్నాలజీని జోడించడం విశేషం. గంగా స్నానాలు, పూజలు, సాంస్కృతిక కార్యక్రమాలతో మహాకుంభమేళా మరింత ప్రత్యేకంగా నిలిచేలా అన్ని ఏర్పాట్లు పూర్తి చేస్తున్నారు.