సైనా నెహ్వాల్తో కలిసి బ్యాడ్మింటన్ ఆడిన రాష్ట్రపతి ముర్ము
![](https://www.vaartha.com/wp-content/uploads/2024/07/President-Droupadi-Murmu-who-played-badminton-with-Saina-Nehwal.jpg)
న్యూఢిల్లీః ప్రముఖ బ్యాడ్మింటన్ క్రీడాకారిణి, ఒలింపిక్ సిల్వర్ మెడల్ విజేత సైనా నెహ్వాల్తో రాష్ట్రపతి ద్రౌపదీ ముర్ము రాష్ట్రపతి భవన్ లోని బ్యాడ్మింటన్ కోర్టులో స్నేహపూర్వక పోటీలో తలపడ్డారు. నిత్యం చీరలో కనిపించే ముర్ము ఈ మ్యాచ్ ఆడేందుకు సౌకర్యవంతంగా ఉండేలా సల్వార్ కమీజ్ ధరించారు. అలాగే కాళ్లకు షూ ధరించి కోర్టులో కలియదిరిగారు. ముందుగా సర్వ్ చేసిన ముర్ము..ఆ తర్వాత ఒక పాయింట్ సాధించగానే ప్రేక్షకులంతా హర్షధ్వానాలు చేశారు.
మరో రెండు పాయింట్లు సాధించినప్పుడు కూడా పెద్ద ఎత్తున చప్పట్లు కొట్టారు. ఇందుకు సంబంధించిన వీడియోను రాష్ట్రపతి భవన్ కార్యాలయం సోషల్ మీడియాలో పంచుకుంది. దేశంలోని చిన్నారులు ఆరోగ్యకరమైన జీవన విధానాన్ని అలవర్చుకొనేందుకు క్రీడలను ఎంపిక చేసుకొనేలా వారిలో స్ఫూర్తినింపేందుకు రాష్ట్రపతి ఈ మ్యాచ్ ఆడినట్లు వివరించింది. రాష్ట్రపతి భవన్ లోని కల్చరల్ సెంటర్ లో శుక్రవారం హర్ స్టోరీ-మై స్టోరీ పేరిట లెక్చర్ సిరీస్ ప్రారంభం కానుంది. పద్మశ్రీ, పద్మభూషణ్ అవార్డుల గ్రహీత అయిన సైనా నెహ్వాల్ ఈ కార్యక్రమంలో తన అనుభవాలను పంచుకోనుంది. మహిళా పద్మ పురస్కార విజేతలు వారి విజయగాథలతో కోట్లాది మంది యువతలో స్ఫూర్తినింపే ఉద్దేశంతో ఈ కార్యక్రమాన్ని రూపొందించారు.
అంతకుముందు డ్యూరాండ్ కప్ ఫుట్బాల్ ట్రోఫీలను రాష్ట్రపతి ఆవిష్కరించారు. ఈ టోర్నీకి ఇది 133వ ఎడిషన్. జూలై 27 నుంచి కోల్కతాలో ఈ పోటీలు ప్రారంభం కానున్నాయి. పద్మ అవార్డు గ్రహీతల కోసం ఆమె కహానీ-మేరీ కహానీ ఉపన్యాస సిరీస్లో భాగంగా, పద్మశ్రీ, పద్మభూషణ్ అవార్డులు పొందిన భారతీయ క్రీడాకారిణి సైనా నెహ్వాల్, రేపు రాష్ట్రపతి భవన్ కల్చరల్ సెంటర్లో ప్రసంగం, ప్రేక్షకులతో సంభాషించనున్నారు.