భారత్, పాకిస్థాన్ సరిహద్దుల్లో తాజా పరిస్థితులు గంభీరంగా మారుతున్న నేపథ్యంలో దేశ ప్రధానమంత్రి నరేంద్ర మోదీ(NarendraModi) భద్రతా అంశంపై ప్రత్యేక దృష్టి సారిస్తున్నారు. ఇటీవల పాకిస్థాన్ వైపు నుంచి కవ్వింపు చర్యలు, డ్రోన్ ముమ్మర చర్యలు, అలాగే పర్యవేక్షణ సాంకేతికతను ఉల్లంఘించే చర్యలతో భారత భద్రతా దళాలు అప్రమత్తమవుతున్నాయి. ఈ పరిణామాల నేపథ్యంలో ప్రధానమంత్రి మోదీ గుజరాత్ ముఖ్యమంత్రి భూపేంద్ర పటేల్‌తో ఫోన్ ద్వారా మాట్లాడారు. సరిహద్దు రాష్ట్రమైన గుజరాత్‌లో భద్రతా పరిస్థితులపై సమగ్ర సమీక్షను మోదీ చేపట్టారు.
గుజరాత్‌లో కీలక భద్రతా ప్రాంతాలపై ప్రధాని దృష్టి
పాకిస్థాన్‌తో సుదీర్ఘ సరిహద్దును పంచుకుంటున్న గుజరాత్(Gujarat) లో భద్రతా ఏర్పాట్లపై ప్రధాని మోదీ ముఖ్యమంత్రి భూపేంద్ర పటేల్ నుంచి వివరాలు అడిగి తెలుసుకున్నారు. ముఖ్యంగా భద్రతాపరంగా అత్యంత సున్నితమైనవిగా పరిగణించే కచ్, బనస్కంతా, పటాన్, జామ్‌నగర్ జిల్లాల్లో ప్రస్తుత పరిస్థితిని, పౌరుల భద్రత నిమిత్తం రాష్ట్ర యంత్రాంగం చేపడుతున్న చర్యలను ప్రధాని అడిగి తెలుసుకున్నారు.
సీఎం భూపేంద్ర పటేల్ వివరాలు
పాకిస్థాన్ నుంచి దాడుల ముప్పు పొంచి ఉన్న నేపథ్యంలో ఈ సరిహద్దు జిల్లాల్లో అధికార యంత్రాంగం పూర్తి అప్రమత్తంగా వ్యవహరిస్తోందని, ప్రజలకు ఎప్పటికప్పుడు అవసరమైన సూచనలు జారీ చేస్తోందని ముఖ్యమంత్రి ప్రధానికి వివరించారు. ప్రజలకు అప్రమత్తత గల సూచనలు జారీ చేయబడి, అత్యవసర సమయంలో ఖాళీ చేయాల్సిన ప్రాంతాల గుర్తింపుతో పాటు ఆపరేషన్ ప్లాన్లు సిద్ధంగా ఉంచబడ్డాయి.
మరోవైపు సరిహద్దుల్లో నెలకొన్న ఉద్రిక్త పరిస్థితుల దృష్ట్యా కేంద్ర ప్రభుత్వం కూడా అప్రమత్తమై కీలక చర్యలు చేపడుతోంది. ఇప్పటికే రక్షణ శాఖ ఆధ్వర్యంలో ఉన్నత స్థాయి సమావేశం జరగ్గా ఆర్థిక, హోం, ఆరోగ్య శాఖల మంత్రులు కూడా తమ తమ శాఖల ఉన్నతాధికారులతో వరుస భేటీలు నిర్వహిస్తున్నారు. ఈ సమావేశాల్లో సరిహద్దు రాష్ట్రాల్లో నెలకొన్న వాస్తవ పరిస్థితులు, ఆర్థికపరమైన సన్నద్ధత, ప్రజలకు అవసరమైన ఆరోగ్య సేవల లభ్యత వంటి పలు కీలక అంశాలపై కూలంకషంగా చర్చించారు.
Read also: Ministry of Defence: దేశంలోని మీడియా సంస్థలకు కీలక హెచ్చరిక చేసిన కేంద్రం