టాలీవుడ్‌లో “భరత్ అనే నేను” చిత్రంతో అరంగేట్రం చేసిన బాలీవుడ్ బ్యూటీ కియారా అద్వానీ, తన తొలి సినిమాతోనే భారీ విజయాన్ని సాధించి ప్రత్యేక గుర్తింపు తెచ్చుకుంది. అందంతో పాటు అభినయం కూడా మెప్పించిన కియారా, వరుస అవకాశాలను అందిపుచ్చుకుంటూ స్టార్ హీరోయిన్‌గా ఎదిగింది. రామ్ చరణ్‌తో “వినయ విధేయ రామ” చిత్రంలో కూడా అలరించిన ఈ ముద్దుగుమ్మ, బాలీవుడ్‌లో “కబీర్ సింగ్” వంటి బ్లాక్‌బస్టర్ హిట్స్‌తో తన క్రేజ్‌ను మరింత పెంచుకుంది. ఇటీవల గ్లోబల్ స్టార్ రామ్ చరణ్‌తో కలిసి నటించిన “గేమ్ ఛేంజర్” చిత్రంలో కనిపించినా, ఆ మూవీ ఆశించిన స్థాయిలో విజయాన్ని నమోదు చేయలేదు.
Read Also : Padma Bhushan : పద్మభూషణ్ అందుకున్న బాలకృష్ణ
తల్లి అవ్వబోతున్న కియారా – కవలల గాసిప్స్ వైరల్
ప్రస్తుతం బాలీవుడ్‌లో కొన్ని ప్రాజెక్టులతో బిజీగా ఉన్న కియారా, తన వ్యక్తిగత జీవితంలో పెద్ద మార్పుకు సిద్ధమవుతోంది. షేర్షా సినిమాలో నటించిన సమయంలో సన్నిహితమైన సిద్ధార్థ్ మల్హోత్రాతో, రెండు సంవత్సరాల డేటింగ్ తర్వాత 2023 ఫిబ్రవరి 7న ఘనంగా వివాహం చేసుకుంది. తాజాగా ఆమె తల్లి కాబోతున్న వార్తలు సోషల్ మీడియాలో హల్‌చల్ చేస్తున్నాయి. కియారా బేబీ బంప్ ఫొటోలు వైరల్ అవడంతో, నెటిజన్లు ఆమె కవల పిల్లలకు జన్మనివ్వనుందని ఊహాగానాలు చేస్తున్నారు. దీనికి కారణం, గతంలో ఓ ఇంటర్వ్యూలో కియారా “నాకు ఇద్దరు ఆరోగ్యమైన పిల్లలు కావాలి, ఒక అమ్మాయి, ఒక అబ్బాయి” అని చేసిన వ్యాఖ్యలు కావడం విశేషం.
సిద్ధార్థ్-కియారా ప్రేమ ప్రయాణం
2021లో విడుదలైన “షేర్షా” సినిమా ద్వారా కియారా, సిద్ధార్థ్ మధ్య మంచి స్నేహం ఏర్పడింది. ఆ స్నేహం నెమ్మదిగా ప్రేమగా మారి, చివరికి పెళ్లి వరకు వెళ్లింది. రాజస్థాన్‌లోని సూర్య గఢ్ హోటల్‌లో కుటుంబసభ్యులు, సన్నిహితుల సమక్షంలో వారి వివాహం వైభవంగా జరిగింది. ప్రస్తుతం కియారా గర్భవతిగా ఉండటంతో అభిమానుల్లో ఆనందం వ్యక్తమవుతోంది. ఇక త్వరలోనే కియారా తన జీవితంలో కొత్త అధ్యాయాన్ని ప్రారంభించబోతోంది. కవలలు పుట్టబోతున్నారా? అనే అంశంపై ఇంకా అధికారిక సమాచారం వెలువడలేదు గానీ, అభిమానులు మాత్రం పెద్ద ఎత్తున శుభాకాంక్షలు వెల్లువెత్తిస్తున్నారు.