మంచు విష్ణు ఎంతో ప్రతిష్టాత్మకంగా తెరకెక్కిస్తున్న “కన్నప్ప” సినిమా గురించి తాజా అప్‌డేట్ అందరినీ ఉత్సాహపరుస్తోంది. ఈ పాన్-ఇండియా ప్రాజెక్ట్ డిసెంబర్‌లో విడుదల కావాల్సి ఉన్నప్పటికీ, చిత్రీకరణ పూర్తికాలేక పోవడంతో రిలీజ్ డేట్‌ను వాయిదా వేశారు. తాజాగా, సినిమాను 2025న వచ్చే సంవత్సరం ఏప్రిల్ 25న రిలీజ్ విడుదల చేయనున్నట్లు మంచు విష్ణు అధికారికంగా ప్రకటించారు. ఈ సినిమా విషయంలో విశేషమేమిటంటే, ప్రముఖ నటీనటులు మధుబాల, ప్రభాస్, నయనతార, మోహన్ లాల్, శివరాజ్ కుమార్, అక్షయ్ కుమార్, మోహన్ బాబు వంటి స్టార్ క్యాస్ట్ తో చిత్రాన్ని అత్యంత ప్రతిష్టాత్మకంగా రూపొందిస్తున్నారు.
బాలీవుడ్ డైరెక్టర్ ముఖేష్ కుమార్ సింగ్ దర్శకత్వంలో రూపుదిద్దుకుంటున్న ఈ సినిమా మంచు విష్ణు డ్రీమ్ ప్రాజెక్ట్‌గా నిలుస్తోంది. మోహన్ బాబు నిర్మాణ బాధ్యతలు తీసుకోగా, సినిమా టీజర్, పోస్టర్లు ఇప్పటికే ప్రేక్షకుల్లో భారీ అంచనాలు పెంచాయి. ప్రస్తుతం “కన్నప్ప” షూటింగ్ చివరిదశలో ఉంది. న్యూజిలాండ్‌లోని అద్భుతమైన లొకేషన్లతో పాటు, రామోజీ ఫిల్మ్ సిటీలో ప్రత్యేకంగా ఏర్పాటు చేసిన భారీ సెట్స్‌లో చిత్రీకరణ జరుగుతోంది. కన్నప్ప జీవిత కథ ఆధారంగా రూపొందుతున్న ఈ సినిమాకు కొంత కల్పిత కథను జోడించారు. కథ నేటి ప్రేక్షకులకు ఆకర్షణీయంగా ఉండేలా దృశ్యమానం చేయడంపై ప్రత్యేక దృష్టి పెట్టారు.
“కన్నప్ప” చిత్రాన్ని తెలుగు, హిందీ, తమిళం, కన్నడ, మలయాళం భాషల్లో పాన్-ఇండియా స్థాయిలో విడుదల చేయనున్నారు. భారీ బడ్జెట్, సమర్థత గల నటీనటులు, సాంకేతిక నిపుణులతో ఈ ప్రాజెక్ట్ మంచి విజయం సాధించబోతుందని సినిమా యూనిట్ విశ్వాసం వ్యక్తం చేస్తోంది. ఇంతటి ప్రతిష్టాత్మక సినిమాను , అభిమానులు మరింత ఉత్సాహంగా ఎదురుచూస్తున్నారు. కన్నప్ప జీవితం ఆధారంగా రూపొందిన ఈ సినిమా ప్రేక్షకుల హృదయాలను ఏ మేరకు గెలుచుకుంటుందో చూడాలి. “కన్నప్ప” వంటి విభిన్న కథాంశం, భారీ తారాగణం కలిగిన సినిమా పాన్-ఇండియా ప్రేక్షకుల్ని ఎంతగానో ఆకట్టుకుంటుందని సినీ విశ్లేషకులు అభిప్రాయపడుతున్నారు.